Сииттэҕэ Олоҥхо ыһыаҕын түмүгэ: икки кинигэ, үрдүк таһымнаах тэрээһин
Сииттэ нэһилиэгэр бу күннэргэ улууспутугар ыытыллыбыт 19-с республиканскай Олоҥхо ыһыаҕа үрдүк таһымҥа ааспытын, Сииттэ дьоно-сэргэтэ биир сомоҕо буолан, күүс-көмө буолбуттарын чиэстиир, улахан тэрээһин буолан ааста. Ол курдук, олохтоох дьаһалта баһылыга Семён Тимофеев бар дьонугар ис сүрэхтэн тахсар махтал мааны тылларынан тэрээһини үөрүүлээхтик арыйда. Кырдьык даҕаны, ааспытын кэннэ санаатахха, сүҥкэн улахан үлэлэр ыытыллыбыттар эбит диэн сөҕө-махтайа саныыгын.
Сыралаах үлэбит үтүө түмүгэ үрдүк таһымнаах буолбутуттан Кэбээйи олохтоохторо сүргэлэрэ көтөҕүллэн, тутум үрдээн олорор буолуохтаахтар.
Сииттэ нэһилиэгэ республиканскай саха таҥаһын күрэҕин эппиэтинэстээхтик ыытан, Нам улууһун 90-н тахса киһилээх делегациятын көрсөн, үс күн устата аһатан-сиэтэн, республиканскай бары күрэхтэргэ көхтөөх кыттыыны ылан, сэмэй ситиһиилэрдээхпитинэн киэн тутуннубут, астынныбыт.
Култуура уонна Олоҥхо сылларыгар сөп түбэһиннэрэн, биир дойдулаахпытын үйэтитэр сыалтан, олоҥхоһут, сэһэнньит, үһүйээннэри хомуйааччы Муотаан «Бэриэт Бэргэн» олоҥхотун, ону тэҥэ «Кындыкаан» остуоруйаны оҕолорго сахалыы тылбаастатан, икки кинигэ тэҥинэн күн сирин көрөр үөрүүлээх презентацията Олоҥхо ыһыаҕар үрдүк таһымҥа ыытыллыбыта элбэҕи туоһулуур. Кинигэ презентациятын сценарийыгар олохтоох библиотека сэбиэдиссэйэ Мария Обутова үлэлэспитэ. Инники өттүн кэрэһэлээн, олохтоох дьаһалта икки кинигэни үбүлээн таһааттарбыта олус хайҕаллаах суол. Олохтоох дьаһалта исписэлииһэ, Муотаан хос сиэнэ Мария Захарова, эһэтин кинигэтэ тахсарыгар үлэтэ, көмөтө улахан. Киниэхэ күүс-көмө, сүбэ-ама буоллулар, улууска биллэр краевед Анна Сивцева уонна Муотаан сиэн кыыһа Ираида Попова. Суруллубут суоруллубат дииллэринии, кэлэр кэнчээри ыччаттарга улахан бэлэх буолла диэн олохтоохтор үөрэллэр.
Нэһилиэкпит тэрилтэлэригэр (салайааччылар Мария Обутоваҕа, Андрей Новгородовка, Ольга Александроваҕа, Татьяна Новгородоваҕа уо.д.а.) ону таһынан түөлбэ салайааччылара, олоҥхобут ыһыаҕар көмөлөрө улахан. Улахан махталбытын тиэрдэбит Агафья Дьяконоваҕа, Ольга Левинаҕа, Марианна Захароваҕа, Анастасия Ивановаҕа, Гаврил Слепцовка. Баһылык Семён Тимофеев, сыл инниттэн олоҥхо ыһыаҕар бэлэмнэнии үлэлэрин аттаран, комиссия тэрийэн эппиэттээх дьоннору анаталаабыта, ону таһынан нэһилиэгин олохтоохторун кытта ыкса үлэлэһэн, ыытыллар үлэлэр кыалыннылар, табылыннылар диэтэхпинэ сыыспат буолуохтаахпын. Олохтоох дьаһалта баһылыгын солбуйааччыта Пётр Степанов, эр дьон түмсүүтун салайааччыта Николай Захаровтыын эр дьону түмэ тардан талах олоппос курдук мындыр үлэлэри кыайа туттулар.
Үтүө түмүгү таһаарар үөрүүлээх тэрээһиҥҥэ, барыта 50-н тахса киһи, мааны тыллаах махтал суруктарынан биһирэннилэр. Өссө төгүл бары үтүөнү баҕаран туран, бар дьоммутугар барҕа махталбытын тиэрдэбит.
Марианна Сивцева
