Олоҥхо ыһыаҕар кырыымпаҕа 100 мусукаан оонньуоҕа
Олоҥхо ыһыаҕын биир чаҕылхай түгэнинэн Амма улууһугар 100 мусукаан кырыымпаҕа оонньуоҕа.
Бу сыалга 2020 сылтан олохтоох маастардар 70 кырыымпаны оҥорбуттара биллэр. Сыл устата кырыымпаны оонньууга маастар-кылаастар ыытыллыбыттар. Маастар-кылаастары Амма орто оскуолатын учуутала Василий Неустроев, «Кыл саха» ансаамбыл салайааччыта Анна Томская, Олоҥхо тыйаатырын артыыстара Айсен Кысылбаиков уонна Прокопий Сыроватскай ыыттылар.
Ыһыах кэмигэр норуот худуоһунньуга Михаил Носов хартыыналарын көрдөрүүтэ былааннанар. Бырайыагы Амма улууһун 14 нэһилиэктэн маастардар 2021 сылтан олоххо киллэрэллэр. Бырайыак сыала-соруга – түҥ былыргы национальнай таҥас-сап, киэргэл уонна олох-дьаһах малларын сөргүтүү уонна үйэтитии. Улахан тэрээһини ыытарга бэлэмнэнии чэрчитинэн улуус муниципальнай тэриллиилэрин ортотугар Олоҥхо испиктээги туруоруу буолла. Бэстибээл олоҥхоһут Т.В. Захарова-Чээбий төрөөбүтэ 155 сылыгар ананар.
Хас биирдии нэһилиэк 400 миэтэрэ уһуннаах ситии оҥорон, тэрээһиннэри ыытарга киэргэл быһыытынан туттуохтара. Ону сэргэ улуус олохтоохторо олбох арааһын тиктилэр. Тэрийээччилэр этэллэринэн, Амма улууһугар Олоҥхо ыһыаҕар 10 тыһыынчаттан тахса ыалдьыт кэлэрэ күүтүллэр. Олоҥхо ыһыаҕа Ил Дархан Айсен Николаев дьаһалынан быйыл бэс ыйын 20-21 күннэригэр Амма улууһугар ыытыллыаҕа.
СӨ Ил Дарханын уонна Бырабыыталыстыбатын пресс-сулууспата
