Кэбээйигэ Олоҥхо ыһыаҕар аналлаах кэмпириэнсийэ саҕаланна
Кулун тутар 11-12 күннэригэр Кэбээйигэ Олоҥхо ыһыаҕар аналлаах «Кэбээйигэ Олоҥхо ыөыаҕа: үгэс утума, Эбэ тыына, айар-тутар эйгэ» XVI научнай-методическай кэмпириэнсийэ ыытыллар. Тэрээһин Арассыыйаҕа Норуоттар сомоҕолоһууларын, Саха сиригэр Култуура сылларыгар ананар.
Василий Потапов хаартыскаҕа түһэриитэ
Тыһыынчаттан тахса кыттааччы, ол иһигэр 19 улуус дэлэгээссийэтэ 2026 сыллаахха Олоҥхо ыһыаҕын ыытыы научнай-методоческай төрүттэрин дьүүллэһэллэр.
Кинилэр икки күн устата 10 сиэксийэнэн мунньахха, 3 дьүүллэһии былаһааккатыгар, 4 төгүрүк остуолга үлэ үөрүйэҕин атастаһыахтара, санааларын үллэстиэхтэрэ. Маны сэргэ сүүрбэттэн тахса сэминээр арааһа уонна маастар-кылаастар ыытыллыахтара.
СӨ Бырабыыталыстыбатын бэрэссэдээтэлин солбуйааччы Сергей Местников кэмпириэнсийэҕэ киэҥ дьүүллэһии уонна таһаарыылаах кэпсэтии буолуоҕар эрэнэрин биллэрдэ.
Кэмпириэнсийэ иитинэн «Кэбээйи түөлбэтин фольклора», «Хомуур олоҥхо» бырайыак биһирэмнэрэ буолуохтаах, «Дьулуруйар Ньургун Боотур», «Бүдүрүйбэт Сүһүөхтээх Мүлдьү Бөҕө», «Кыыс Дэбилийэ», «Дьорҕостой Бэргэн» олоҥхо-испэктээктэри көрдөрөллөр. Маны сэргэ, «Тэлээрис» норуот ансаамбыла муҥха сиэрин-туомун билиһиннэрдэ. Сэбээн Күөл орто оскуолатын 8 кылааһын үөрэнээччитэ Иванна Слепцова олоҥхону эбээн тылынан толордо. Мастаах орто оскуолатын 7 кылааһын үөрэнээччитэ Артем Архипов Ф.С. Семенов — Кырса Сөдүөт «Биэ уола Бэйбэлдьин Тулаайах» олоҥхотуттан быһа тардан ааҕан иһитиннэрдэ. Маны сэргэ, «Олоҥхо эйгэтигэр айан» бэстибээл саҕаланар уонна «Олоҥхо ыһыаҕа» диэн оҕолорго аналлаах оонньуур полигон үлэлиэхтээх.
СӨ Ил Дархана Айсен Николаев Олоҥхо күнүгэр, сэтинньи 25 күнүгэр, 2025 сыллаахха олоҥхоҕо, оһуохайга, тимир уустарыгар уонна норуот маастардарыгар истипиэндьийэлэри туттарыы сиэригэр-туомугар Олоҥхо үһүс уон сылын Саха сиригэр ыытар туһунан дьаһалга илии баттаабыта. Ил Дархан бу сыллар усталарыгар олоҥхону харыстааһыҥҥа уонна тарҕатыыга, үөрэтии, култуура, интэриниэт ситимигэр бырайыактары олоххо киллэриигэ, кинигэлэри таһаарыыга улахан үлэ ыытыллыбытын тоһоҕолоон бэлиэтээбитэ.
Сиһилии: https://www.sakha.gov.ru/news/39154