Олоҥхо ыһыаҕа: сувенир уонна харысхал оҥоруутугар маастар кылаас

Кэбээйи улууһугар быйылгы сыл уратыта —  Олоҥхо ыһыаҕын тэрээһинигэр бэлэмнэнии үлэтэ буолар. Кулун тутар 11 күнүгэр Кэбээйи сэл. Олоҥхо ыһыаҕар анаммыт XVI билим-методическай өрөспүүбүлүкэтээҕи кэмпириэнсийэ чэрчитинэн, сувенир уонна харысхал бэлиэлэри оҥорууга семинар уонна маастар-кылаас тэрилиннэ.

Хаартыска: Полина Жергина тиксэриитэ.

Тэрээһин ыытааччытынан, модераторынан Россия художниктарын союһун чилиэнэ, СӨ култууратын уонна үөрэҕириитин туйгуна, П.П. Романов аатынан Дьокуускайдааҕы ойуулуур-дьүһүннүүр училище дириэктэрэ Александра Анатольевна Неустроева үлэлээтэ. Кини салалтатынан семинарга Саха сирин араас муннуктарыттан кэлбит маастардар, уһуйааччылар, урбаанньыттар уонна музей үлэһиттэрэ, уран тарбахтаахтар түмсэн үлэ хайдах салҕанарын, ыһыахха бэлэмнэнии хаамыытын ырытыстылар.

Семинарга республикабыт, улууспут араас муннуктарыттан кэлбит дьон бэйэлэрин уопуттарын үллэһиннилэр. Софья Попова «Чороон XXI» салайааччыта айымньылаах үлэтин билиһиннэрдэ. Амма уустарын түмсүүтүн аатыттан Роман Алексеев харысхал суолтатын туһунан кэпсээтэ. Куокуй нэһилиэгиттэн эбии үөрэхтээһин педагога Оксана Игнатьева оҕолору уонна ыччаты төрүт үгэскэ уһуйуу, кинилэри ыһыахха бэлэмнээһин туһунан иһитиннэрдэ, туос харысхал оҥортордо. Чагдаттан социальнай педагог Эльвира Эверстова түмсүүлээх үлэ түмүгэр оҥоһуллубут сувенирдар ньымаларын көрдөрдө, саҥа технологиялары тарҕатта. Тыайа нэһилиэгин музейын үлэһитэ Екатерина Архипова былыргы оҥоһуктары чинчийэн, хомуйан, билиҥҥи олоххо киллэрии, музей малларын көрдөрүүгэ бэлэмнээһин туһунан кэпсээтэ. Маны таһынан, иҥиири хатаран иискэ туттуу ньымаларын көрдөрдө.  Кэбээйи уһуйаанын иитээччитэ Марина Попова собо хатырыгыттан кэрэ киэргэллэрин туһунан кэпсээтэ, ураты оҥоһуктарын холобур кынан көрдөрдө. Нам улууһуттан маастар Лариса Тавакалова туой хомпуор иһиккэ, Дьокуускайдааҕы ойуулуур-дьүһүннүүр училищеттан Софья Макарова гипсэттэн, Людмила Федорова алтантан сувенирга маастар-кылаастары ыыттылар. Семинарга икки күн устата уопсайа 67 киһи сырытта, 8 маастар-кылаас буолла.

Бу көрсүһүү түмүгэр маастардар уонна кыттыылаахтар бэйэ-бэйэлэриттэн үөрэннилэр, санааларын атастастылар, ыһыахха анаан оҥоһуллар сувенирдар, харысхаллар оҥоһууларын биир өрүккэ киллэристилэр. Александра Анатольевна бэйэтин этиитигэр, маннык тэрээһиннэр үйэттэн үйэҕэ утумнанан кэлбит төрүт үгэстэри харыстааһыҥҥа, сайыннарыыга уонна ыччакка тириэрдиигэ сүҥкэн суолталаахтарын бэлиэтээтэ.

Семинары иилээн-саҕалаан ыытарга, Кэбээйи улууһун Куокуй нэһилиэгиттэн Полина Андреевна Жергина уонна Надежда Валерьевна Илларионова тирэх,  көмө буоллулар.

Полина Жергина.