Ил Дархан бирииһигэр олоҥхоһуттар I күөн-күрэстэрэ

Ил Дархан бирииһигэр олоҥхону үгэс быһыытынан толорууга өрөспүүбүлүкэтээҕи І күөн-күрэс үөрүүлээх аһыллыытыгар кытынным.

Ил Дархан Айсен Николаев «Олоҥхо Үһүс Уон сылын биллэрии туһунан» дьаһалыгар олоҕуран, ааттаах-суоллаах билиҥҥи кэм олоҥхоһуттарбыт 3 түһүмэхтээх олоҥхону үгэс быһыытынан толорууга «УРУЙДАН, УЛУУ ОЛОҤХОБУТ» өрөспүүбүлүкэтээҕи бастакы күөн-күрэс маҥнайгы түһүмэҕэр бүгүн Арчы дьиэтигэр алгыс тылынан, арыылаах алаадьы дыргыл сытынан, көөнньүбүт быырпах амтанынан саҕаланна.

Түһүлгэҕэ Чурапчы, Таатта, Амма, Нам, Сунтаар, Мэҥэ Хаҥалас, Горнай, Уус Алдан, Бүлүү, Муома, Хаҥалас улуустарыттан ааттаах-суоллаах 37 олоҥхоһут кыттар.

Күрэс икки күн устата — бүгүн уонна сарсын ыытыллар. Иккис түһүмэҕи ыам ыйыгар күүтэбит.

Бэлиэтээн эттэххэ, олоҥхоһуттарбыт 4 чаастан кылгаһа суох толоруохтаахтар. Дьэ, онтон үһүс түһүмэххэ, сэтинньигэ, аҕыс чаастан итэҕэһэ суох толорон, күөн көрсүөхтэрэ!

Кыттааччыларга ситиһиилэри, күрэх бэркэ ааһарыгар баҕарабын!

Афанасий Ноев