Сииттэҕэ — “Куйуур олоҥхото-2026”
Кэбээйи улууһун Сииттэ нэһилиэгэр муус устар 3-4 күннэригэр олоҥхоһут И.А. Николаев-Куоҕас Уйбаан төрөөбүтэ 120 сылын бэлиэтиир тэрээһиннэр чэрчилэринэн өрөспүүбүлүкэтээҕи «Куйуур олоҥхото-2026» бэстибээл үрдүк таһымҥа ыытылынна.
Арассыыйаҕа Норуоттар доҕордоһууларын, Саха Өрөспүүбүлүкэтигэр Култуура, Кэбээйи улууһугар Олоҥхо, Сииттэ нэһилиэгэр Норуот айымньытын сылларыгар анаммыт тэрээһиммит олоҕурда.
Кэбээйи улууһугар өрөспүүбүлүкэтээҕи Олоҥхо ыһыаҕа ыытылларынан, Сииттэ сиригэр «Куйуур олоҥхото-2026» ыччат бэстибээлигэр ыраахтан- чугастан тоҕуоруһан кэлбит 50-тан тахса ыалдьыты — ылбаҕай ырыалаах, добун тойуктаах, омуннаах олоҥхолору толорор бастыҥ ыччаппыты уонна тимири эллиир, күүстээх — уохтаах дархан уус дьоммутун сахалыы сиэринэн арыылаах алаадьынан, уохтаах кымыһынан, алгыстаан, арчылаан көрүстүбүт.
Куйуур олоҥхотун тула куйаарга тахсан, тойук алыптаах доҕуһуолугар олорсон, тэрээһиммит үөрүүлээх арыллыытын уу сахалыы тыыннаах эҕэрдэ кэнсиэринэн арыйдыбыт. Дьоһун түһүлгэҕэ Кэбээйи улууһун баһылыга Иван Левин, Сииттэ сэлиэнньэтин баһылыга Семен Тимофеев, “Куйуур олоҥхото” бэстибээл ааптара, ХИФУ бэрэпиэссэрэ, тыл билимин хандьытаата, Мэнэ Хаҥалас, Муома улуустарын бочуоттаах олохтооҕо Г.С.Попова — Санаайа, Дьокуускай куорат олонхотун дьиэтин сүрүн исписэлииһэ, култуура туйгуна Евдокия Иванова эҕэрдэ тылларын анаатылар.
Бастакы күн тохтор тойуктарын, ылбаҕай ырыаларын, олоҥхолорун эдэр кэскиллээх, ыччат дьоммут толорон иһитиннэрдилэр. Сарсыҥҥы күммүтүгэр дойдубут барахсан күрэх кыттааччыларыгар, ыалдьыттарыгар анаабыт курдук күнү бэлэхтээтэ. Дьоммут сүргэлэрэ өссө ордук көтөҕүллэн, киһи астынар күрэҕин тэрийдилэр. Нэһилиэк олохтоохторо аҕа уустарынан туруорбут 250 тыһыынча уу харчыларын, Куйуур олоҥхотун бары кыттааччыларыгар анаатылар. Кэлбит ыалдьыттар олус үөрэн, астынан туран, бар дьоммутугар дириҥ махталларын тиэртилэр.
Бары күүппүт “Куйуур олоҥхото” күрэҕэр I миэстэни Чурапчы Арыылааҕыттан сылдьар хамаанда, II миэстэни Сииттэ «Хапытаан» хамаандата, III бочуоттаах миэстэни Сииттэ 2-c хамаандата уонна IV миэстэни Нам хамаандата ыланнар, олохтоох дьаһалта туруорбут 100 тыһ. суумалаах ссэртипикээттэрин үөрэ-көтө үллэһиннилэр.
Бу курдук Кэбээйи улууһугар, Сииттэ нэһилиэгэр бастакытын ыытыллыбыт республикатааҕы “Куйуур олоҥхото” түмүктэннэ.
Сииттэ нэһилиэгэ төһө да кыра буоллар, таһыччы түмсүүлээхтэрин, сомоҕолоохторун кэлбит ыалдьыттар үрдүктүк сыаналаатылар. Тэрээһин сүрүн салайааччылара эҕэрдэ тылларыгар өссө төгүл чиҥэтэн бэлиэтээтилэр.
Ханнык баҕарар улахан тэрээһини эппиэтинэскэ ылыах иннинэ, бастатан туран, баһылык толкуйдуур. Сүбэ мунньах кэнниттэн тэрилтэ, түөлбэ салайааччыларын, дьокутааттарын кытта эппиэтинэстээх анал хамыыһыйалар тэриллэн, үлэ күөстүү оргуйан барбыта. Былааннаммыт үлэ ситэн, барыта орун оннугар оҥоһуллан, тэрээһиммит үрдүк таһымҥа ааспытыгар, баһылыкпытыгар Семен Тимофеевка, баһылык солбуйааччытыгар Петр Степановка, Сииттэ орто оскуолатын (дириэктэр Андрей Новгородов) көхтөөх учууталларыгар, бары үлэһиттэригэр, минньигэс аһынан күндүлээбит пуобардарыгар Лена Платоноваҕа, Люда Петроваҕа, Айталина Соловьеваҕа, Сардана Поротоваҕа, оскуола хаһаайыстыбыннай чааһыгар эппиэттиир Анастасия Ивановаҕа, «Чуораанчык» уһуйаан (сэб. Ольга Александрова) үлэһитигэр Алексей Аргуновка, аҕа сүбэтин бэрэссэдээтэлигэр Николай Захаровка, маны таһынан улуус дьаһалтатыттан, өрөспүүбүлкэттэн кэлбит дьүүллүүр сүбэни буор-босхо минньигэс ас астаһан көмөлөспүт Агафья Захароваҕа улахан махталбытын тиэрдэбит. Сииттэ орто оскуолатыгар «Ситим» кыраайы үөрэтэр түмэл үлэһитигэр, СӨ үөрэҕин туйгунугар, элбэх кинигэ ааптарыгар Анна Сивцеваҕа, ону тэнэ «Алаһа» эбээлэр кулууптарыгар (сал. Мотрена Васильева) уонна да атын күүс-көмө буолбут бар дьоммутугар өссө төгүл улахан махталбытын тиэрдэбит.
Кэбээйи улууһугар ыытыллар Олоҥхо ыһыаҕын чэрчитинэн, кэрэ кэскиллээх Кэбээйибит улууһун бар дьоҥҥо билиһиннэрэр, көрдөрөр инниттэн үөрэ-көтө тэрийэн, санаабыт астынан, үөрүүбүт үксээн олоробут.
Марианна Сивцева.