Олус үчүгэй олоҥхо-испэктээк
Саха гимназията «Оскуола уонна тыйаатыр» диэн бэртээхэй бырайыактаах. Ол чэрчитинэн олоҥхонон испэктээктэри эмиэ туруораллар.
Холобура, 2014 сыллаахха Сергей Васильев-Борогонскай «Мөҥүрүүр Бөҕө» олоҥхотун туруорбуттарын «Хотугу сулус» телерадиоакадемия устубута, ол видеота биһиги саайпыт архыыбыгар үйэтитиллибитэ: https://olonkho.nlrs.ru/archives/8220
Быйыл Өрөспүүбүлүкэ күнүгэр Саха тыйаатырын сыанатыгар Саха гимназиятын III “б” кылааһын үөрэнээччилэрэ Евдокия Иринцеева-Огдо “Хотой куттаах, Луо тыыннаах, Орто дойду олоҕун көмүскүүр аналлаах Мэндэ Бухатыыр» диэн олоҥхотунан испэктээк көрдөрдүлэр.
Бу олоҥхонон испэктээк 2023 сыллаахха, Өймөкөөҥҥө ыытыллыбыт Олоҥхо ыһыаҕын көрсө, Үүнэр көлүөнэ тыйаатырыгар тура сылдьыбыта, ыһыахха эмиэ оонньоон көрдөрбүттэрэ. Режиссер Валентина Якимец этэ.
Оттон бу Саха гимназиятын испэктээгин Саха Сирин талааннаах ыччатын үгүс сыллар тухары режиссураҕа, норуот уус-уран айымньытыгар, сыана маастарыстыбатыгар уһуйан кэлбит Мария Гаврильевна Боппоенова туруорда.
Кини А.Д. Макарова аатынан Култуура уонна ускуустуба кэллиэһин преподавателэ, онон устудьуоннара, үөрэнэ таарыйа, эмиэ кыттыстылар. Уус-уран салайааччынан Дария Михайловна Муксунова айымньылаахтык үлэлээтэ.
Биллэн турар, оҕолору дьарыктыыр үгүс сыраны эрэйэр. Маныаха кылаас салайааччыта, уопуттаах учуутал Людмила Георгиевна Дедюкина, үөрэнээччилэрин кытта наһаа истиҥ сыһыаннаах буолан, туох да мөҕүүтэ-этиитэ суох, биир тылынан сааһылаан-бэрээдэктээн, репетиция ахсын барыларын айар турукка киллэрэн бэлэмнэстэ.
Төрөппүттэр көхтөөхтөрө үөрдэр. Кырачаан артыыстар таҥастарын, көстүүмнэрин хааччыйыы кинилэргэ сүктэриллибитин таһынан, өссө муусуканан эмиэ киэргэттилэр, туох баар ымпык-чымпык боппуруостары барытын бэйэлэрэ быһаарсан тэрийистилэр.
Испэктээк кэмигэр экраҥҥа оҕолор уруһуйдарын, оҥоһуу өй көмөтүнэн хамсатан, ойуулук курдук көрдөрбүттэрэ – сонун көстүү буолла.
Испэктээги режиссер олус бэркэ туруорбут буолан, оҕолор даҕаны анал театральнай устуудьуйаҕа дьарыктанар курдук таһымнаахтык оонньоон, көрбүт эрэ бары хайҕаата, сылдьыбыт эрэ биһирээтэ.
Нууччалыы эйгэлээх киин куорат оҕолоро, төрөөбүт тылларынан саҥаран, хайдах эрэ, кэҥээбит, боччумурбут, арыллыбыт курдук буолбуттарын ийэлэрэ да, аҕалара да бэлиэтииллэр. Кинилэргэ бу түмсүү, сүпсүлгэн оҕо саас умнуллубат чаҕылхай түгэнэ буолан өйдөрүгэр-санааларыгар хатанан хаалыаҕа.
Бачча үчүгэй испэктээги биирдэ эрэ буолбакка, алын кылааһы бүтэриэхтэригэр диэри хаста да көрдөрөллөрө эбитэ буоллар диэн эрэнэ саныыбыт.
Саха Өрөспүүбүлүкэтигэр Култуура, Арассыыйаҕа Норуоттар сомоҕолоһууларын сылларынан, итиэннэ Өрөспүүбүлүкэ уонна аан бастакытын бэлиэтэммит Аҕыйах ахсааннаах норуоттар күннэринэн бэртээхэй бэлэх буолла.
