«Куйуур олоҥхото-2027» Намҥа буолуоҕа

Муус устар 28 күнүгэр Ленскэй нэһилиэк баһылыга Петр Григорьевич Сокольниковка Кэбээйи улууһун Сииттэ нэһилиэгин баһылыга Семен Тимофеевич Тимофеев “Куйуур олоҥхотун” бэлиэтин туттарда.

Онон 2027 сылга Нам улууһугар “Куйуур олоҥхото” ыытыллыаҕа.

Эстафетаны туттарыы П.П. Ядрихинскай-Бэдьээлэ аатынан Намнааҕы Олоҥхо дьиэтигэр  буолла.

Бэлиэтээн эттэххэ, муус устар 3-4 күннэригэр Кэбээйи улууһун Сииттэ нэһилиэгэр “Куйуур олоҥхото-2026” өрөспүүбүлүкэтээҕи фестиваль буолан ааспыта.

“Куйуур олоҥхото-2026” ыччат өрөспүүбүлүкэтээҕи түһүлгэтин “Куйуур” күрэҕэр1-кы Хомустаахтан 5 киһилээх эр дьон хамаандата кыттыбыта.

Олоҥхону толорууга Назар Филиппов (Таастаах), Арктикатааҕы ГИКАИУ студена, II үрдэлинэн бэлиэтэммитэ. Бары кыайыы-хотуу аргыстанан, ситиһии көтөллөнөн, сыаналаах, уу харчынан бириистэринэн наҕараадаланан, үөрэн-көтөн кэлбиттэрэ. Тэрээһиннээх кыттыытын иһин П.П. Ядрихинскай-Бэдьээлэ аатынан Намнааҕы “Олоҥхо дьиэтэ” Кэбээйи улууһун дьаһалтата олохтообут “Көмүлүөк” фирма саха иһитэ анал бирииһинэн наҕараадаланна.

—Кэбээйигэ биһиги эрэ улуус толору састааптаах кыттыбыппыт. 1-кы Хомустаахтан эр дьон хамаандатын тимир ууһа Андрей Винокуров сүрүннээн ситиһиилэммиттэрэ.

Олоҥхону толорбут Назар Филипповы дьүүллүүр сүбэ бэрэссэдээтэлэ Г.С. Попова-Санаайа улаханнык хайҕаабытыттан астынабыт. Эдэр киһи инникитин үүнэн-сайдан иһэригэр баҕарабыт. Сииттэ нэһилиэгин дьаһалтатыгар, олохтоохторугар “Куйуур олоҥхото-2026” өрөспүүбүлүкэтээҕи фестивалы үрдүк таһымҥа тэрийбиттэрин иһин аҕа баһылык Семен Тимофеевич Тимофеевка, Кэбээйи улууһун баһылыга Иван Иванович Левиҥҥэ уонна улуустар Олоҥхо дьиэлэрин биир ситимҥэ киллэрэр, сүбэ-ама биэрэр “Олоҥхо-Эпос” киинин сэбиэдиссэйигэр Евдокия Николаевна Ивановаҕа барҕа махталбытын тиэрдэбит, — диир Вера Васильевна Колпашникова, П.П. Ядрихинскай-Бэдьээлэ аатынан “Олоҥхо дьиэтин” дириэктэрэ, Нам улууһун делегациятын салайааччыта.

Источник: https://xn--h1aaigu4ed.xn--p1ai/lenskej-ne%d2%bbiliek-kujuur-olo%d2%a5hoto-belieni-tutta/