«Үөлэн Хардааччы» олоҥхону көрдөрдүлэр
Өктөм нэһилиэгэр Арассыыйа үрдүнэн Норуоттар сомоҕоһууларын, Саха Өрөспүүбүлүкэтигэр Култуура, Хаҥалас улууһугар Сомоҕолоһуу уонна биир санаанан айан-тутан түмсүүлээх буолуу сылларын арыйдыбыт.
Олохтоох дьаһалта испэсэлииһэ Нарьяна Капитонова: «Үүммүт саҥа сылга түмсүүлээх буолан айан-тутан, нэһилиэкпитин сайыннарыаххайыҥ», — диэн ыҥырда. Өктөм орто оскуолатын үөрэнээччилэрэ, уолаттар, төрөөбүт дойдутуһунан хоһоону ис дууһаларыттан аахпыттара барыбытын долгутта.
Бу оскуола «Күн күлүмүрэ» үҥкүү бөлөҕүн (сал. Мария Угапьева) хотугулуу эрчимнээх, нэһилиэк «Арылык» үҥкүү бөлөҕүн (сал. Надежда Черкашина) уоттаах-төлөннөөх узбекскай үҥкүүлэрэ дьон-сэргэ дохсун ытыс тыаһынан биһирэннэ. Агротехнологическай университет Өктөмнөөҕү салаатын устудьуона, омугунан таджик уол Рахимзон Саидзода сахалыы Александр Самсонов-Айыы Уолун «Сардаана» ырыатын олус ис киирбэхтик толорон, дьону астыннарда. Руслан Игнатьев, Алексей Фомин толорууларыгар Лидия Харитонова тылларыгар, Александр Уваровскай дьүрүлүгэр «Култуура үлэһиттэрин өрөгөй ырыата» барыбытыгар эрчими сахта, үрдүккэ-кэрэҕэ угуйда.
Эҕэрдэлэр кэннилэриттэн Өктөм орто оскуолатын 6-8 кылааһын үөрэнээччилэрэ Сергей Васильев-Борогонскай «Үөлэн Хардааччы» олоҥхотун көрдөрдүлэр.
Оҕолор олус табыллан, ис дууһаларыттан толорбуттара харахха быраҕыллар. Үөлэн Хардааччы уонна кэпсээччи оруолун толорбут Айсен Диодоров сирэйинэн-хараҕынан, туттарынан-хаптарынан бэйэтин оруолун үрдүк таһымҥа толордо. Иккис былааннаах оруолга оонньообут Дарина Андрееваны дьон-сэргэ олус сэҥээрдэ. Уопсайынан, оҕолор бары даҕаны олус кыһаллан оруолларыгар киирэн оонньообуттарын бэлиэтиибин. Кэлбит дьон бары олус астыннылар, сорохтор оҕолор толорууларыттан соһуйдулар. Манна оҕолор сайдалларын бары өттүнэн өйүүр оскуола дириэктэрин Калиста Афанасьеваны хайҕыахха сөп. Оҕолору кытта биир тэтимҥэ сылдьар, кинилэри бэлэмниир, төрөөбүт тылларыгар угуйар дьоннорунан буолаллар саха тылын учуутала Татьяна Давыдова уонна музыка учуутала Анна Яковлева. Кинилэр хас биирдии оҕо тылын билэригэр, хамсаныытыгар, уопсай олоҥхо ис хоһоонун дьоҥҥо тиэрдиитигэр кыһаллан үлэлэһэллэр.
Оҕолорбут кулун тутар ыйга Бүтүн Россиятааҕы оҕолор тыйаатырдарын күрэхтэригэр Пермь куоракка бараары бэлэмнэнэ сылдьаллар. Онон кинилэргэ күүс-көмө буолан айаннарыгар көмөлөһүөххэйиҥ диэн ыҥырабыт.
Федора Фомина, Өктөм с., Хаҥалас