Олоҥхо аныгы култуура киэбинэн
Туйаара Стручкова ОЛОҢХО тиэмэтинэн цифровой уруһуй быыстапкатыгар сырыттыбыт. Олоңхоһут Людмила Константиновна Цой куйаар ситимигэр, олоңхоҕо, саха олоҕор Туйаара Стручкова үлэлэрин ситимнээх сэһэнэ уһулуччу үчүгэй тэрээһин буолла!
Цифровой живопись— аныгы технология көмөтүнэн бүгүн айар талаан арыллыытыгар биир саңа көрүң. Манна классическай живопись олук билиилэрэ — хартыына тутула (композиция), өңү дьүөрэлээһин уонна киһи быһыыты-таһаатын (анатомия) табыы — барыта киирэн, ураты үлэ суруллуон сөптөөҕүн Туяра Стручкова үлэлэрэ көрдөрдөрдүлэр. Баай ис хоһоонноох сюжет арыллыытыгар олоңхо тутулун дириңник үөрэтэн, чинчийэн таһаарбыта киһини сөхтөрөр.
Эдэр худуоһунньук бэйэтин туспа буочарын, аптаах-алыптаах олоңхо тойугун уруһуйунан хоһуйуута дьоңңо-сэргэҕэ арыйан, сиһилии сааһылаан биэрбитэ саха култууратыгар биир улахан хардыы буолла диэн сыаналаатым. Аан дойдуга ОЛОҢХОНОН кэпсээн кэһиилээх үлэ тахсыбытын бэлиэтии көрдүм.
Ол курдук, саха норуотун цивилизацията түң былыргы култуураны илдьэ сылдьара, норуот быһыытынан туспа күлүүс өйдөбүллэрдээҕин, киһи аймах үрдүк аналлаах орто дойдуга олох олорорун чаҕылхайдык арыйда.
Айыы тыла — ойуу тыла буолан, куйаар сэһэнэ тылынан уонна уруһуйунан бииргэ сиэттиһэн, (интеграция искусств) тэриллибитэ икки төгүл күүһүрэн көһүннэ, иһилиннэ.
Людмила Цой баай билиитэ киэң куйаар устун саха философията, итэҕэлэ, олоҕо барыта биир тиһик буолан сайдан кэлбитин кэрэ кэпсээнинэн арыйда. КИҺИ олорор олоҕун устата, айыллан кэлиэҕиттэн олоҕун айанын устата, хайдах сайдарын сааһылаан кэпсээтэ. Бу баар ОЛОҢХО үрдүк анала! Маннык сахалыы наҕыллык, уустаан -ураннаан кэрэтик ойуу тыллаан, олоңхо тойуктаах ырыатынан, САХА норуотун уһулуччу билиитин, алыптаах эйгэтин ураты кэпсээн түһүлгэтэ баарын бары саңа аллайа арыйдыбыт.
Лекция биир чахчыта диэн — саха сирин хас да олоңхотугар олоҕуран бэлиэтээһиннэр, чинчийбит учуонайдар, туттуллубут кинигэ ааптардара барыта ыйыллан туран кэпсээни салайдылар. Бу ОЛОҢХО билимин биир сайдар суола. Людмила Константиновна киэң билиитин, чинчийиитин бэлиэтээн, Саха Сирин норуотун академига диэн сыаналаатыбыт, ис сүрэхтэн махтанныбыт.
Түмүккэ эттэххэ, Саха Сиригэр КУЛТУУРА сылыгар, Тааттаҕа АЙАР СИТИМ сылыгар ханна да суох, ханна да хатыламмат, ураты саңа киэптээх (новая форма) тэрээһин аанын арыйдыбыт!
Марианна Степанова, Таатта.