Национальнай кэнсиэпсийэ 35 сылынан төрүт култуураҕа туһуламмыт Олоҥхо онлайн олимпиадата

Бу ыам ыйын 23 күнүгэр саха оскуолаларын саҥардан сайыннарар соруктаах  Национальнай кэнсиэпсийэ ылыллыбыта  35 сылын туолар.

Саха омук дьылҕатыгар уонна устуоруйатыгар улахан сабыдыалы оҥорбут Кэнсиэпсийэ күнүн бэлиэтээн, төрүт култуураҕа туһуламмыт Олоҥхо онлайн олимпиадатын ыытабыт.

Онуоха туран, эһиэхэ боппуруос бөҕө үөскүүрэ чуолкай. Ол ыйытыыларгытыгар быһааран хоруйдуубут:

 “Тоҕо үөрэх дьылын бүтүүтэ?”

• Эппиппит курдук, Национальнай кэнсиэпсийэбит үбүлүөйдээх даатата. Саха тылларын учууталлара бу сыл устата оскуолаҕытыгар тэрээһин ыытаргыт буолуо, онно сыһыараргыт тоҕоостоох;  

• Сүрүн тэрийээччи Национальнай бибилэтиэкэ буолан, Бибилэтиэкэ күн көрсө, Бүтүн Арассыыйатааҕы “Бииргэ ааҕабыт” аахсыйа чэрчитинэн ыытыллар;

• Мантан сайын ыһыахтар буолуохтара, онон саха үгэһин, сиэрин-туомун, фольклорун, олоҥхотун, номоҕун, остуоруйатын, өбүгэ саҕаттан тиийэн кэлбит матырыйаалынай нэһилиэстибэбитин билиини тургутарга саамай табыгастаах кэм.

 “Төрүт култуура олимпиадата эрээри, тоҕо Олоҥхо диэний?”.

Олоҥхо үһүс Уон сыла биллэриллибитинэн, итиэннэ Арассыыйаҕа норуоттар сомоҕолоһууларын, Саха Өрөспүүбүлүкэтигэр Култуура сылларынан, бу 2026 с. устата хас да хайысхананыытыллар “Олоҥхо дойдутугар айан” диэн бырайыак чэрчитинэн бу олимпиада тэриллэр. Онон “олоҥхо” диэн тыл булгуччу баар буолара ирдэнэр. Уонна, бу диэн эттэххэ, төрүт култуурабыт барыта олоҥхоҕо баар буоллаҕа эбээт, онон итинник ааттаммыта оруннаах даҕаны.

“Оҕолор каникулга баран эрэллэр, эксээмэннээх кылаастар сололоро суох, аралдьыйыа суохтаахтар”.

• Бастатан туран, бу олимпиада 10 мүнүүтэ эрэ оҥоһуллар. Сынньана таарыйа да толоруохха сөп.
•  Иккиһинэн, булгуччулаах буолбатах, ким баҕалаах кыттар. Ол эрээри түмүккэ көхтөөхтүк кыттыбыт оскуолалардаах МО бэлиэтэниэҕэ.
• Анаан бэлэмнэнэр наадата суох, тургутук курдук судургу. Үөрэнээччилэргит төһө билиилээхтэрин бэрэбиэркэлээн буолбатах, төттөрүтүн билэллэрин чиҥэтээри, билбэттэрин өйдөөн хаалалларыгар анаан.
• Оскуола  иһигэр оҥоһуллубут, дьиэлэригэр толороллор.     

Тэрийээччилэр: Cаха Өрөспүүбүлүкэтин национальнай бибилэтиэкэтэ, Саха Өрөспүүбүлүкэтин үүнэр көлүөнэтин тус сыаллаах пуондата, Саха Өрөспүүбүлүкэтин “Олоҥхо ассоциацията” уопсастыбаннай тэрилтэ, Олоҥхо научнай-методическай үлэҕэ уонна тас сибээскэ киинэ, Саха Өрөспүүбүлүкэтин бибилэтиэкэлэрин ассоциацията, Саха Сирин төрүт олохтоох норуоттарын култуураларын уонна тылларын сыыппара эйгэтигэр көһөрөр киин.

 Кытталлар: өрөспүүбүлүкэ оскуолаларын I-XI кылаастарын үөрэнээччилэрэ.

Кыттыыны хааччыйаллар: бу олимпиаданы көҕүлүүр дьонунан саха тылын учууталларын улуустааҕы уонна Дьокуускай куораттааҕы уокуругун оскуолаларын методическай холбоһуктарын (МО) бэрэссэдээтэллэрэ буолаллар. Кинилэр саха тылын учууталларыгар этэн, оскуолалар  көхтөөхтүк кытталларын ситиһиэхтээхтэр.

Олимпиада усулуобуйата:

• үс күн устата (22-24.05. 2026) ыытыллар, онон бары кытталларыгар бириэмэ баар.

• икки тылынан ыытыллар: нууччалыы уонна сахалыы – оҕо бэйэтэ ханнык тылынан толороро табыгастааҕынан көрөн талар;

• онлайн киэбинэн барар;

• 10 ыйытыылаах буолар, хас биирдии боппуруоска үстүү эппиэт бэриллэр, онтон биири талаллар;

• толорор бириэмэлэрэ болдьохтоох – 10 мүнүүтэ;

• биир оҕо биирдэ эрэ холонор кыахтаах;

• түмүгэр электроннай Туоһу сурук бэриллэр. Ону бэйэтигэр хачайдаан ылыан баҕарар буоллаҕына, ыйыллыбыт Юкассаҕа 100 солкуобайы төлүүр;

• Туоһу сурукка оҕо аата-суола, кылааһа, оскуолата, хас баалы ылбыта барыта ыйыллар, онон бастаан регистрацияланар, тус кэбиниэтин арынар. Ол судургу, туох да уустуга суох. Ыйыы-кэрдии (инструкция) олимпиада ыытыллар платформатыгар баар буолуоҕа;

Буолар күнэ-дьыла: 2026 сыл ыам ыйын 22-24 күннэригэр. Соруйан өрөбүллэргэ түбэһиннэрдибит. Тоҕо диэтэххэ, төрөппүт оҕо аттыгар баар буолуохтаах. Тоҕо, туохха? Туоһу сурукка үөрэнээччи аата-суола, оскуолата, кылааһа ыйылларынан, сөбүлэҥҥэ баттыыр.  Биир мөһөөҕү эмиэ кини төлүүр буоллаҕа дии. Итиэннэ алын кылаас оҕотугар регистрацияланарыгар көмөлөһөрө чуолкай.

Олимпиада платформатын сигэтин ыам ыйын 21 күнүгэр МО салайааччыларыгар ыытыахпыт, ол күн эһиэхэ тарҕатыахтаахтар.

Түмүгү таһаарыы: ханнык улууска, оскуолаҕа хас оҕо кыттыбыта статистикаҕа көстөр. Саамай көхтөөх 3 улуус уонна Дьокуускай куорат 3 оскуолатын (куорат таһынааҕылар манна киирсэллэр) методическай холбоһуктара харчынан наҕараадаланаллар.

Улуустарга (оройуоннарга):

I миэстэ – 16 тыһыынча солкуобай;

II миэстэ –14 тыһыынча солкуобай;

III миэстэ – 12 тыһыынча солкуобай.

Дьокуускай куораттааҕы уокурук оскуолаларыгар:

I миэстэ – 12 тыһ. солк;

II миэстэ – 9 тыһ. солк;

III миэстэ – 7 тыһ. солк.

Кимнээх миэстэлэспиттэрин ыам ыйын 27 күнүгэр Национальнай бибилэтиэкэ саайтыгар таһаарыахпыт, сигэтин тарҕатыахпыт.

Наҕараадалааһын: кыттыбыт оҕолор, этиллибитин курдук, тута Туоһу сурук туталлар. Махтал суруктары МО бэрэссэдээтэллэригэр ыытабыт, ону бэйэлэрэ суруйан, кытыннарбыт учууталларга тарҕаталлар.

 Миэстэлэспит улуустар уонна куорат оскуолаларын МО-ларыгар харчынан бириистэрин уонна Үүнэр көлүөнэлэргэ туһуламмыт пуонда анал грамотатын туттарыы күһүн буолуоҕа, кэлэр үөрэх дьылыгар, “Олоҥхо дойдутугар айан” бырайыак үөрүүлээхтик түмүктэнэр тэрээһинигэр.

Билсэр төлөпүөҥҥүт: 89142223579.

Балаһыанньата: