Олоҥхонон испэктээк нэһилиэги түмтэ
Хаҥалас улууһун Чкалов арыытын III Малдьаҕар оскуолатыгар уруккута өрөспүүбүлүкэҕэ саха тылыгар бастыыр үөрэнээччи, билиҥҥитэ бэйэтэ олимпиадник оҕолору үөрэтэн таһаарар күүстээх учуутал Туйаара Прокопьевна Самсонова үлэлиир.
Кини төрүт бу арыы кыыһа эбит. Төрдө-ууһа Харыйалаах Федоровтара. Итинник диэтэххэ, дьон үксэ сахалартан бастакы истребитель лүөччүк Иван Афанасьевич Федоровы саныы биэрэр. Чахчы, бары биир аймахтар. Кинилэр удьуордарын тэниппит үс бииргэ төрөөбүт Сүөдэрдэр тустарынан Туйаара Прокопьевна “Солбонуйбат Сур соноҕостоох Дохсун Боотур бухатыыр” диэн остуоруйа-олоҥхону суруйбут. Бырааттыылары Хаҥыл Боотур, Намыын Боотур уонна Дохсун Боотур диэн ааттаабыт.
“Солбонуйбат Сур соноҕостоох Дохсун Боотур бухатыыр” остуоруйа-олоҥхотун Туйаара Прокопьевна бастаан утаа “Арыы оҕолоро” фольклорнай бөлөҕөр аахтарара. Оттон бу саас аны бэйэтэ режиссердаан, испэктээк гына туруорда.
Премьерата олунньу 28 күнүгэр Чкалов сынньалаҥ киинигэр буолбута. Дьокуускайтан фольклору чинчийэр учуонай, тыл билимин дуоктара Людмила Спиридоновна Ефимова тиийэн көрөн хайҕаабыта.
Саамай кэрэхсэбиллээҕэ, бу испэктээккэ И.А Федоров аатынан оскуола-уһуйаан оҕото барыта оонньообута буолар: 21 үөрэнээччитэ уонна дьыссаат 8 кырачаана.
Ону сэргэ оскуола кэлэктиибэ, урут бүтэрбиттэр уонна төрөппүттэр. Быһата, арыы олохтооҕо бары кытынна.
Онон култуураҕа уонна сомоҕолоһууга туһуламмыт бэлиэ сылга култуура күүһүнэн сомоҕолоһуу буолла, олоҥхо барыларын түмтэ. Кырдьыга да, манна хаһан да сыанаҕа тахсыбатахтар кытта оруолга тиксэннэр, уобараска киирэннэр, артыыстаан көрдүлэр, тойуктаабатахтар туойарга холоннулар.
Сэҥээрбиппит диэн, бары саҥа таҥастаахтарын. Уран тарбахтаах учууталлара Инна Владимировна Архипова кылгас кэм иһигэр, оскуолаҕа үлэлии-үлэлии, дьиэтигэр киэһэтин уонна өрөбүллэригэр турбакка да олорон тикпит.
Бачча үчүгэй көстүүмнэр кэлин атын араас тэрээһиннэргэ уларсыкка сылдьар буолаллара чахчы. Ол иннинэ анаммыт олоҥхотугар туһаныллан, атын нэһилиэктэргэ, өссө ыраата баран эттэххэ, куоракка да кэлэн көрдөрүөхтэрин сөп.
Оттон эһиги бу сип-билигин даҕаны “Солбонуйбат Сур соноҕостоох Дохсун Боотур бухатыыр” испэктээги толору көрүөххүтүн сөп. “Олоҥхо” сайтка анаан устубуппут. Ону көрөргүтүгэр табыгастаах буоллун диэн, Вконтакте таһаардыбыт. Сигэтэ бу https://vkvideo.ru/video-218062294_456239107