Олоҥхо тыыннаах тыла — «Тыыннаах тыл» олоҥхотугар

Национальнай кэнсиэпсийэ 35 сылынан төрүт култуураҕа туһуламмыт Олоҥхо онлайн-олимпиадатыгар Оҕо айымньытын дыбарыаһын иһинэн тэриллибит «Тыыннаах тыл» сайыҥҥы уһуйаан оҕолоро, көхтөөхтүк кыттан, өрөспүүбүлүкэтээҕи таһымнаах сэртипикээттэри туттулар.

Уон күннээх күнүскү лааҕыр хас биирдии күнэ кэрэхсэбиллээх буолла. Оҕолор оннооҕор СӨ наукаҕа академиятыгар кытта ыалдьыттаатылар: педагогика билимин дуоктара, бэрэпиэссэр Феодосия Васильевна Габышеваны кытары көрсүһүүгэ сырыттылар.

Феодосия Васильевна төрөөбүт тылы уонна төрүт култуураны билии суолтатын оҕоҕо дэбигис өйдөнөр гына судургу тылынан быһааран биэрдэ. Оттон Светлана Степановна Семенова саха тылын туһунан тэттик ойуулугу көрдөрдө, Надежда Николаевна Васильева төрөөбүт тыл мэйиини кытта ыкса ситимнээҕин туһунан кэпсээтэ. Кинилэр иккиэн тыл билимин хандьыдааттара. Учуонай дьон, кэнчээри ыччакка болҕомто ууран, бириэмэлэрин анаан, көрсүһүү тэрийбиттэрэ биһирэмнээх.

Саамай хайҕаллааҕа – кылгас кэм иһигэр оҕолор, «Дьулуруйар Ньургун Боотур» олоҥхоттон быһа тардыыны үөрэтэн, П.А. Ойуунускай аатынан Литературнай түмэл балаҕаныгар буолбут түмүктүүр үөрүүлээх тэрээһиҥҥэ, көмүлүөк оһох тула олорон, төрөппүттэригэр толорон иһитиннэрдилэр.

Тыл кыһатыгар дьарыктаммыт 17 оҕо нэдиэлэттэн эрэ ордук кэмҥэ элбэҕи биллилэр, сахалыы саҥаларын сайыннардылар, тылларын баайын хаҥаттылар, төрүт култуура тургутугар кытыннылар, олоҥхолоон көрдүлэр. Ону туоһулуур суруктары Оҕо айымньытын дыбарыаһын дириэктэрэ Т.И. Иванова үөрүүлээх быһыыга-майгыга туттартаата.

Төрөппүттэр уһуйааччыларга М.П. Поповаҕа, Е.Е. Ермолаеваҕа, Л.А. Романоваҕа махтаналларыгар: «Эһиил сайын «Тыыннаах тыл» өссө хас да симиэнэнэн тэриллэрэ буоллар», — диэтилэр.