Олоҥхо дьиэлэрин ситимнэрэ: Сабантуй-Ыһыах
Эпос уонна ускуустуба Аартыкатааҕы киинин иһинэн салаллан үлэлиир Олоҥхо дьиэлэрин ситимнэрэ, Татарстан өрөспүүбүлүкэтин Нижнекамскай куоратыгар төрүт үгэспитин, баай култуурабытын, ырыабытын-тойукпутун, оһуохайбытын, уран оҥоһуктарбытын, сатабылбытын көрдөрдөрөн, Сабантуй-Ыһыах улахан тэрээҺиннэригэр кытынныбыт.
Сэттэ улуустан Амма, Уус Алдан, Горнай, Мэҥэ Хаҥалас, Ньурба, Сунтаар Олоҥхо дьиэлэрин ситимнэрэ, Хаҥалас улууһун Арчы дьиэтэ кытыннылар.
Бастаан тиийэн, бэлэмнэнии үлэтэ ыытылынна. Бэс ыйын 5 күнүгэр Нижнекамскай куораттааҕы Уус-уран айымньы дьиэтигэр «Диалог культур» кэнсиэр, уус-уран оҥоҺуктар быыстапкалара буолла.
Ыалдьыттары Мэҥэ Ханалас, Горнай улууһун холбоһуктаах кэлэктииптэрин тыыннаах доҕуҺуолунан, арыылаах алаадьынан көрүстүбүт.
Уус-уран оҥоһуктар быыстапкаларыгар Сунтаар, Ньурба, Горнай, Амма, Мэҥэ Хаҥалас, Уус Алдан, Хаҥалас улуустарын Олоҥхо дьиэлэрин көҕүлээһиннэринэн 3 түмсүү, 25 маастар үлэлэрэ туран, Татарстан дьонун-сэргэтин биһирэбилин ылла.
Харысхаллары, киэргэллэри оҥорууга маастар кылаастары ыыттылар: Евдокия Иванова тирии сэлиэччиктэри киэргэтиигэ (Уус Алдан), Айталина Санникова (Горнай) валяниенан харысхал оҥоруутугар, Мария Николаева (Ньурба) моойторук тигиитигэр, Дора Игнатьева, Ольга Игнатьева (Хаҥалас) сиэлтэн ымыы оҥоруутугар, Екатерина Васильева (Уус Алдан) ситии хатан, туос иһит тигиитигэр, Роман Иванов (Мэҥэ Хаҥалас) хомус, кырыымпа оҥоруутугар, Анастасия Степанова (Амма) кылтан, сиэлтэн өрүүгэ, Даайа Моруо туойтан харысхаллары оҥорууга (Горнай).
Быыстапкаҕа кылтан, сиэлтэн ат толору симэҕэ, сөрүөлэр, паннолар, аттаран кыбытан тигии, валяниеттан көбүөрдэр, удьурҕайтан олоҥхо дьоруойдарын тэттик скульптуралара — киһи сөҕөр кэрэ үлэлэрэ — Нижнекамскай олохтоохторун биһирэбилин ыллылар. Уус-уран оҥоһуктар быыстапкаларын Татарстан өрөспүүбүлүкэтин баһылыга Раис Р.Н. Минниханов көрөн хайҕаата уонна инники өттүгэр үлэлэҺиигэ баҕа санаатын биллэрдэ.
Сабантуйга Саха Сирин дэлэгээссийэтэ, сиэдэрэй таҥаспытын кэтэн парааттаан хааман, култуурунай бырагыраамаҕа кытынныбыт. Саха Сирин түһүлгэтигэр ыһыахпыт сиэрин-туомун көрдөрдүбүт, Аллараа Бэстээх Г.Г. Колесов аатынан Олонхо дьиэтин алгысчыта Денис Оконешников алгыһы көтөхтө. Ыһыаҕы көрө кэлбит биир дойдулаахтарбыт, олохтоох нэһилиэнньэ сиэргэ-туомҥа иһийэн туран кыттыстылар, ылыннылар.
Далбар хотуттар ыалдьыттары уохтаах кымыһынан, арыылаах алаадьынан айах туттулар. Саха ырыата-тойуга, хомус, кырыымпа доҕуҺуола, сахалыы үҥкүү-битии тардылынна. Ону иистэнньэҥнэр тикпит саха мааны таҥастара ситэрэн биэрдэ, бииртэр биир кэрэ нүөмэрдэри көрөөччүлэр ытыс тыаһынан доҕуҺуоллаатылар.
Түмүккэ добун оһуохайга кэлбит дьон бары киирэн, киэн түҺүлгэ тэрилиннэ. Көрөөччүлэр хойукка диэри барбакка, астыммыттарын-сөхпүттэрин биллэрэн, түһүлгэҕэ сырыттылар.
Татарстан өрөспүүбүлүкэтин Нижнекамскай куоратыгар норуоттар доҕордоһууларын бигэргэтэн ыытыллыбыт Сабантуй-Ыһыах тэрээһиҥҥэ Олоҥхо дьиэлэрин ситимнэрэ, бары биир кэлэктиип курдук,, сомоҕолоһон үлэлээтилэр.
Евдокия Иванова, СӨ Эпос уонна ускуустуба Аартыкатааҕы киинин эпическэй салаатын салайааччыта.
Сиһилии ВК АЦЭИ бөлөҕөр ааҕыҥ https://vk.com/wall-232975294_479