Олоҥхо ыһыаҕар куттал суох буолуутун хааччыйыы үлэтин күүһүрдүөхтэрэ

Ил Дархан мунньаҕар Кэбээйи улууһугар Олоҥхо ыһыаҕар бэлэмнэнии үлэ хаамыытын уонна ыһыах кэмигэр куттал суох буолуутун хааччыйыы боппуруостара көрүлүннүлэр.

Андрей Сорокин хаартыскаҕа түһэриитэ, ЯСИА

Кэбээйи улууһун баһылыга Иван Левин иһитиннэрбитинэн, Олоҥхо ыһыаҕар бэлэмнэнии бигэргэтиллибит былаан быһыытынан баран иһэр. Далааһыннаах тэрээһин кыттыылаахтарыгар уонна ыалдьыттарыгар куттал суох буолуутун хааччыйарга быраабы араҥаччылыыр уорганнар, быыһыыр сулууспалар уонна да атын биэдэмистибэлэр кыттыылаах тэрийэр уонна өйдөтөр, сүбэлиир кэлим дьаһаллар ыытыллаллар.

Ыһыах буолар сиригэр-уотугар көрөр-хонтуруоллуур пууннар тэриллиэхтэрэ, ботурууллааһын уонна бары структуралар, биэдэмистибэлэр икки ардыларынааҕы үлэлэр күүһүрдүллүөхтэрэ.

Тэрээһин ыытыллар кэмигэр Кэбээйи сэлиэнньэтигэр арыгыны атыылааһын бобуллар. Сибээс хаачыстыбатын үрдэтэргэ үлэ ыытыллар. Ууга сөтүөлээһини сэрэтэр бэлиэлэр туруоруллубуттар.

Олоҥхо ыһыаҕын бэлэмнэниир уонна ыытар хамыыһыйа үлэтэ бигэргэтиллибит былааҥҥа сөп түбэһиннэрэн ыытыллара бэлиэтэннэ. Туруоруллубут сыалы-соругу толорорго эппиэттээхтэр бэлэмнэр.

Мунньах түмүгэр Айсен Николаев Олоҥхо ыһыаҕар кыттааччылары уонна ыалдьыттары уунан айанныылларыгар таһарга куттал суох буолуутун хааччыйарга ураты болҕомтотун уурда.

—Бу боппуруоска эбии болҕомтону уураргытыгар көрдөһөбүн. Тоҕо диэтэххэ, элбэх киһини уунан таһыы сабаҕаланар. Манна бары дьаһаллары ылыахха наада дии саныыбын. Уопсай күүһүнэн туруоруллубут соруктары кыайыахпыт, тэрээһиннэри үрдүк таһымҥа ыытыыны хааччыйыахпыт диэн эрэнэбин, — диэн бэлиэтээтэ Айсен Николаев.

СӨ Ил Дарханын уонна Бырабыыталыстыбатын пресс-сулууспата

Сиһилии: https://www.sakha.gov.ru/news/53225