Бырабыыталыстыба отчуота олоҥхонон арылынна
Атамай. Бүгүн улууспутугар ситэриилээх былаас уорганын 2025 с. икки күннээх отчуота саҕаланна. СӨ култуураҕа уонна духуобунай сайдыыга миниистирэ Афанасий Ноев салайааччылаах бөлөх улууспут биир киэҥ историялаах Атамай нэһилиэгэр айаннаатыбыт.
Миниистирдэр, департамент үлэһиттэрэ, артыыстар, айыы сиэрин тутуһан, айан аартыгар ытык эбэҕэ тохтоон ыллылар. Онно аара суолга массыына тохтоппут айанньыты ылан, бэрт сымнаҕастык айаннаан кэллибит. «Оо, олор доҕор» диэн эйэҕэс тыллара олус үөртэ.
Бырабыыталыстыба отчуотун бөлөҕөр күн бастакы аҥаарыгар нэһилиэнньэни кытта биирдиилээн көрүстэ. Ити кэмҥэ киэҥ сырдык саалаҕа Олоҥхо театрын артыыһа Яна Ньургусова олоҥхолоон дуораһытта. Бырабыыталыстыба мунньаҕа маннык сахалыы тыынынан арыллыыта, норуот туһугар, кини кэскилин туруулаһыыга туһуланалларыгар бигэ олук буолара саарбахтаммат.
Нэһилиэнньэ мунньахха көхтөөхтүк кытынна. Туһааннаах ыйытыктарын, санааларын ботуччу этиннилэр.
Ол курдук, «Хаарбах туруктаах дьиэттэн көһөрүү» бырагырааманан саҥа 12 кыбартыыралаах дьиэ тутуута хаһан тутулларын ыйыттылар. Биэнсийэҕэ тахсыы урукку курдук, ол эбэтэр дьахтар 50, эр дьон 55 саастарыгар тахсалларын туруорсаллар.
Айан суолугар ааһар үрэхтэр, күөллэр сахалыы ааттарын суруйууга үлэ барыытыгар этиилээхтэр. Водопровод тардыллан, үлэҕэ киириитигэр тохтоотулар. Үрдүкү дуоһунаска киирэр үлэһиттэр булгуччу сахалыы саҥаралларыгар этиилээхтэр.
Оҕолор сахалыы сайа саҥаралларын тула үлэ күүскэ барара уолдьаспытын ыйан туран, бииргэ үлэ ыытарга этии киллэрдилэр. Элбэх хайысхалаах баараҕай дьиэ дизельнай станцията, салгылатар тэриллэрэ ситэтэ суох үлэлииллэрин эттилэр.
Баһаарга охтубут мастары хомуйуу бэрээдэгин чуолкайдастылар. «Үтүө дьыала» бырагырааматынан тутуллубут «Радуга» оҕо уһуйааныгар хапытаалынай өрөмүөн барарыгар, уонна хаһан федеральнай былааҥҥа киирэрин ыйыттылар. Билигин уһуйааҥҥа физкультура инструкторын штата хамнас аҥаарыгар үлэлиир, толору штат көрүллэрин туруорсаллар.
«Кэскил» саҥа кыбаартал олохтоохторо дьиэлэрэ тымныытын эттилэр. Элбэх хайысхалаах культурнай спортивнай дьиэҕэ үлэлэспит олохтоох дьон үлэлэрин өҥөлөрө баччааҥҥа диэри бэриллэ илигин ыйыттылар. Оҕо стоматолога нэһилиэнньэҕэ кэлэн, үлэлииригэр көрдөһөллөр. Федеральнай суолларга суол бэлиэлэрэ аҕыйаҕын ыйдылар.
Элбэх оҕолоох ийэлэр анал бэлиэлэргэ оҕолорун саастара хапсыбатаҕынан, ылбакка хаалбыттарын ыйан туран, улууспут аныыр «Ийэҕэ махтал» диэн анал бэлиэҕэ киирсэллэригэр этии киллэрдилэр. Диана Федорова элбэх оҕолоох ийэ «Ийэ Албан Аата» бэлиэҕэ ыыппыт докумуона ханна тиийбитин ыйытта. Маны таһынан сопхуоска үлэлээбит нэһилиэк кырдьаҕас олохтооҕо Савва Алексеев өлүүлэммит пайын ылбакка сылдьарын эттэ. Ону тэҥэ үүт туттарааччылар харчылара тоҕо тардыллан турарыгар эмиэ тохтоотулар.
Нина Сутакова, «Үлэ күүһэ» хаһыат