«Олоҥхо дойдутун оҕотобун» бэстибээлгэ биһирэннилэр
Кулун тутар 26-28 күннэригэр Саха Өрөспүүбүлүкэтин Култуураҕа уонна духуобунай сайдыыга министиэристибэтин, Олоҥхо тыйаатырын, Олоҥхо киинин тэрийиилэринэн XXIX «Олоҥхо дойдутун оҕотобун» өрөспүүбүлүкэтээҕи бэстибээл күрэс буолан ааста.
Үгэс быһыытынан олоҥхону толоруу утумун, толоруу сатабылын, оҕо айар дьоҕурун сайыннарар уонна тарҕатар сыалы тутуһар тэрээһин Дьокуускай куоракка Өксөкүлээх Өлөксөй аатынан Норуоттар доҕордоһууларын дьиэтигэр буолла. Күрэс оскуола иннинээҕи саастаах уонна оскуола оҕолоругар олоҥхону биирдиилээн, куолаан толоруу уонна дакылаат ааҕыы түһүмэхтэринэн ыытылынна. Саха сирин араас улуустарыттан бэрт элбэх оҕо кэлэн кыттыыны ылла.
Бэстибээл түмүгүнэн олоҥхону биирдиилээн толорууга оскуола иннинээҕи саастаах оҕолорго Харатааҕы «Кэрэчээн» уһуйаан улахан бөлөҕүн иитиллээччитэ Мэри Тастыгина (салайааччы Евдокия Попова) бастакы истиэпэннээх үрдэл, куолаан толорууга Майатааҕы «Мичил» уһуйаан иитиллээччилэрэ бастакы истиэпэннээх үрдэл, Төхтүрдээҕи «Мичил» оҕону сайыннарар киин иитиллээччилэрэ анал аат туһааннаахтара буоллулар.
