Кырачааннар олоҥхо көрдүлэр
Харатааҕы «Кэрэчээн» оҕо саадын иитиллээччилэригэр ураты үөрүүлээх уонна умнуллубат түгэн буолла.
Олоҥхо тыйаатырын талааннаах артыыстара кэлэн саха норуотун сүүнэ кэрэ уус-уран айымньытыттан ‒ «Кыталык Куо» олоҥхоттон быһа тардыыны испэктээк быһыытынан көрдөрөн, оҕолор куттарын-сүрдэрин долгуттулар.
Кэрэхсэбиллээх тэрээһин кырачааннарга саха норуотун духуобунай баайын, үйэлээх кэрэ айымньытын кытта чугастык билсэр ураты толомон түгэни бэлэхтээтэ.
Артыыстар олоҥхону ураннык, ис дууһаларыттан толорууларынан, кэрэ ырыаларынан-тойуктарынан оҕолору умсугуттулар. Олоҥхо дьоруойдарын тиийимтиэ гына итэҕэтиилээхтик оонньоон көрдөрдүлэр.
Оҕолор испэктээги астынан, сэргээн көрдүлэр. Хас биирдии оҕо кэрэҕэ тардыһар, төрүт тылбыт алыптаах дорҕооннорун истэр үөрүүтүнэн туолла.
Маннык испэктээк оҕолорго саха тылыгар уонна култууратыгар тапталы, киэн туттууну иитиигэ улахан суолтаны ылар. Итинник тэрээһиннэр оҕо толкуйдуур, ырытар дьоҕурун сайыннараллар, өйүн-санаатын байыталлар.
«Кэрэчээн» оҕо саадын кэлэктиибэ Олоҥхо тыйаатырын артыыстарыгар кэрэ бэлэхтэрин иһин улахан махталбытын тиэрдэбит. Маннык сырдык, кэрэ тэрээһиннэр оҕолорго умнуллубат түгэннэри бэлэхтииллэр уонна төрүт култуураҕа сыһыаннарын кэҥэтэллэр.
