Олоҥхо — оҕо хараҕынан

Муус устар 26 күнүгэр Өксөкүлээх Өлөксөй аатынан Дьохсоҕон орто оскуолатын уһуйааныгар үгэс буолбут «Олоҥхо — оҕо хараҕынан» тэрээһин бэрт сэргэхтик, сонуннук ыытылынна. Ол курдук, тэрээһиҥҥэ уһуйаан иитиллээччилэрэ, төрөппүттэрэ, эбэлэр түмсүүлэрэ, оскуола үөрэнээччилэрэ, үлэһиттэрэ сахалыы сайбаччы таҥнан, тоҕуоруһа муһуннулар

Тэрээһин сүрүн сыалынан оҕолор сыл устата ылбыт билиилэрин, сатабылларын дьоҥҥо-сэргэҕэ көрдөрүү, өбүгэлэрбит үтүө үгэстэрин утумнаан, салгыы сайыннарыы буолар.

Тэрээһиммит хас да сүрүн түһүмэхтэн турар. Бастакытынан, кэлбит ыалдьыттары оскуолабыт үөрэнээччилэрэ — бэйэбит эдьиийдэрбит, убайдарбыт сахалыы сиэринэн айах тутан көрүстүлэр. Аспытын үлэһиттэр бэлэмнээн, тупсаҕай гына иһиттээн, алгыс тыллаан туттараммыт ыалдьыттарбыт сэҥээриилэрин ыллыбыт.

Салгыы Вера Гаврильевна Харайданова — Далбардаах оҕолорго, ыалдьыттары сыт таһааран арчылаата, алҕаата, суолтатын бэрт тиийимтиэ гына оҕолорго быһааран кэпсээтэ. Онтон оҕолорбут олоҥхо геройдарын уобарастарын таҥнан-саптан, саҥаран-иҥэрэн, хамсанан-имсэнэн, үҥкүүлээн косплей быһыытынан оонньоон көрдөрдүлэр.

Оскуолабыт үөрэнээччитэ Богдан Карбаканов олоҥхоһут оруолун бэрт итэҕэтиилээхтик толорон тэрээһиммитин киэргэттэ. Кыра бөлөх оҕолоро эрэкэ-дьэрэкэ оҕолор, орто бөлөхтөр үс дойду олохтоохторо, улахан бөлөхтөр олоҥхо персонажтара буолан астына кытыннылар. Төрөппүттэр кыһамньыларынан тигиллибит косплей көстүүмнэри көрөөччүлэр сөҕө-махтайа көрдүлэр. Косплей түмүгэр оскуола үөрэнээччитэ —  улууска, республикаҕа элбэх күрэхтэргэ кыттар оһуохайдьыт Паша Харайданова оһуохай түһүлгэтин төрүттээн, оҕолордуун-улаханныын оһуохайдаан тэйдибит.

Салгыы иитээччилэр  төрөппүттэргэ анаан тэрийбит 5 түһүмэхтээх «Саха буолан сандаарыах…» квест-оонньууга биэс хамаанда илин-кэлин түһүстүлэр, уустук сорудахтары толордулар, Сахабыт сирин туһунан билиилэрин хаҥаттылар.

Оҕолорго А.К. Андреев аатынан «Сырал тулааһына» балаҕаҥҥа сахалыы оонньуу араас көрүҥэ тэриллэн оҕо аймах үөрүүтүнэн туолла. Бу курдук үгэскэ кубулуйбут тэрээһиммит  дьон-сэргэ биһирэбилин ылан бэрт сэргэхтик ааста. Күүс-көмө буолбут төрөппүттэрбитигэр, коллективпытыгар, НАДь үлэһиттэригэр, В.Г. Харайданова-Далбардаахха дириҥ махталбытын тиэрдэбит.

Саргылана Рожина,

А.Е. Кулаковскай аатынан Дьохсоҕон оскуола-сад

уһуйаанын салайааччыта