“Дыллыа маҥан аттаах Дьырыбына Дьырылыатта кыыс бухатыыр”

Нам улууһун Таастаах нэһилиэгиттэн төрүттээх Назар Максимович Филиппов биир дойдулааҕа П.П. Ядрихинскай-Бэдьээлэ “Дыллыа маҥан аттаах Дьырыбына Дьырылыатта кыыс бухатыыр” олоҥхотун толорорун көрүҥ.

Наһаар ийэтинэн эһэтин бииргэ төрөөбүт быраата, Модут нэһилиэгин ытык киһитэ Константин Никонович Тихонов  Нам улууһугар тойуксутунан, олоҥхоһутунан биллэр эбит. Таайын талаанын утумнаабыт  уолу саха тылын уонна литературатын учуутала Туяра Алексеевна Соловьева бэлиэтии көрөн, олоҥхо эйгэтигэр сиэтэн киллэрбит. Оччолорго Наһаар 13 саастааҕа.

Бу дьарыга кинини “Хотугу сулус” курдук өрөспүүбүлүкэтээҕи куонкурустарга сирдээн аҕалан, барытыгар ситиһиилээхтик кыттан, оскуоланы бүтэрэригэр туох да саарбаҕа суох Култуура уонна ускуустуба кэллиэһин “этнохудожественное творчество” диэн салаатыгар туттарсан киирэр. Онно Мария Гаврильевна Боппоенова уонна Галина Анатольевна Лыткина үөрэтэн-такайан,  салгыы Култуура, ускуустуба уонна  айар индустрия Аартыкатааҕы университетын устудьуона буолар.

Онон билигин Наһаар АГУИККИ иккис кууруһугар үөрэнэ сылдьар. 21 саастаах эдэр уол “ЗЕМА” ыччат түмсүүтүн бастыҥ актыбыыһа. Ону сэргэ Дьокуускайдааҕы 39-с нүөмэрдээх оскуолаҕа оҕолору фольклорга үөрэтэр.

 “Куйуур олоҥхото”, “Муҥха олоҥхото”, Олоҥхо ыһыаҕын күрэстэригэр холонон көрөр. Эрчимэн Бэргэн, Ньургун Боотур, Дьырыбына Дьырылыатта уонна Уолан Дохсун туһунан биллэр олоҥхолортон толорор.

“Олоҥхом эйгэтэ миэхэ ийэ толкуйу, сахалыы иитиини уонна биир интэриэстээх доҕотторбун биэрдэ”, — диэн санаатын үллэстэр.

Видеоны уһулла уонна таҥна Михаил Эверстов-Соргу