Бэлиэ сылга бэрт бэлэх

Бүлүү улууһун култууратын эйгэтигэр 2026 сыл биир дойдулаахпыт, Саха Сирин биллиилээх олоҥхоһута Василий Осипович Каратаев–Харатай Баһылай сылынан биллэриллибитэ.

Быйыл төрөөбүтэ 100 сыла. Онон кини аатын сүгэр «Аар Дьаҕыл» олоҥхоһуттар уонна тойуксуттар норуодунай кэлэктииптэрин «Харатай ыччаттара» бөлөҕө Олоҥхо ыһыаҕар салайааччыбыт Светлана Тарасовна Иванова тэрийиитинэн баран кыттан кэллибит.

«Кырсалыы кылыһахтаан, куоҕастыы куйуһутан, тахсан күн сардаҥатынан олоҥхолоох олоҕу туойдахпына…» күөн-күрэскэ биһиги Харатай норуокка киэҥник биллэр «Моҕол кугас аттаах Модун Эр Соҕотох» олоҥхотуттан быһа тардан толордубут.

Мин Туналыкаан Куо буолан, тойукпунан кытынным.

Улуу киһибит 100 сыллаах уонна «Аар Дьаҕыл» бөлөх 35 сыллаах үбүлүөйдэригэр олох таһымнаахтык кыттар соруктаах этибит. Ол сыалбытын ситистибит — I үрдэллээх Добун суругу туттубут.

Бэлиэ сылгабу кыайыыбыт бэлэх буолла, онон бары да олус үөрдүбүт.

Анна Черкашина,

Бүлүүтээҕи Оҕо ускуустубатын Чернышевскайдааҕы филиалын уһуйааччыта,

Чинэкэ, Бүлүү

2026 с. от ыйын 6 күнэ