Олоҥхону кыбытыган ойуулаабыт өкүндүлэр
Бүлүү улууһугар биллэриллибит Утумнааһын уонна айар-тутар сылга култуура эйгэтигэр аатырбыт олоҥхоһут Василий Осипович Каратаев – Харатай Баһылай төрөөбүтэ 100 сылыгар аналлаах улууспут ыһыаҕар «Түөлбэ талаана» култуура бэстибээл-күрэс уонна Бүлүү улууһун нэһилиэктэрин икки ардыларыгар ыытыллар «Сайдыы-түмсүү бастыҥ түөлбэтэ» улуустааҕы көрүү-күрэс чэрчитинэн сукунаттан кырадаһыннары холбоон тигии ньыматынан декоративнай панно оҥорууга «Олоҥхо уран оһуора» быыстапка-күрэскэ биһиги «Чэчир» сынньалаҥ киинин иһинэн үлэлиир «Уран» диэн куруһуок (сал.Сивцева М.Г.) кыттыылаахтара тикпит паннолара 600 диэри нэһилиэнньэлээхтэргэ бастакы миэстэни ылбыта..
Бу улахан мындыр үлэ элбэх сыраны-сылбаны ылбыта саарбаҕа суох. Итинэн биһиги кыргыттарбыт «талааннаах киһи барытыгар талааннаах» диэн этиини өссө төгүл бигэргэттилэр.
Өссө бу тикпит паннолара Кэбээйигэ ыытыллыбыт Олоҥхо ыһыаҕын маанылаах киэргэлэ буолла, Ил Дархан интервьютугар фон буолан турбута — Өкүндү олохтоохторугар киэн туттууну, үөрүүнү аҕалла. Инньэ диэн туран, паннону тикпит уран тарбахтаах Далбардарбытыгар — кулууппут эдэр, элбэҕи эрэннэрэр талааннаах испэсэлииһэ Ульяна Ивановаҕа, ветеран үлэһит, дэгиттэр талааннаах Агафия Петроваҕа, детсад салайааччыта Быяна Сивцеваҕа, оскуола учуутала Светлана Евсеева уо.да а. — махтанабыт.
Аатырбыт «Сардаана» фабрикаҕа иистэнньэҥинэн үлэтин саҕалаан, кэлин художник-модельерынан үлэлээн, норуот маастарыгар тиийэ үүммүт, СӨ норуотун хаһаайыстыбатын үтүһөлээх үлэһитэ, Арассыыйа худуоһунньуктарын сойууһун чилиэнэ, биһиги, өкүндүлэр киэн туттар эдьиийбитин Анна Алексеевна Волкованы утумнаабыттар диэтэхпинэ сыыспатым буолуо.
Бу буолар утум салҕаныыта, утум быстыбата! «Чэчир» сынньалаҥ киин үлэһиттэригэр инникитин да үлэҕитигэр өссө үрдүк ситиһиилэри баҕарабын, дьон туһугар үлэҕитин өрүү үрдүктүк сыаналыыбын, талааҥҥыт өссө да аһылла турдун!
Нина Иванова,
Өкүндү