Бүлүү олоҥхоһуттарын уруйдаах түһүлгэтэ
Саха сиригэр Култуура, Бүлүү улууһугар Утум уонна үүнүү-сайдыы, киэн туттар олоҥхоһуппут В.О. Каратаев төрөөбүтэ 100, В.О. Каратаев аатынан «Аар Дьаҕыл» олоҥхоһуттар уонна тойуксуттар норуодунай кэлэктииптэрэ тэриллибитэ 35 сылларынан уонна Саха Өрөспүүбүлүкэтигэр Олоҥхо күнүн көрсө, «Бүлүү олоҥхоһуттарын уруйдаах түһүлгэтэ» бырайыак чэрчитинэн, Алгысчыт, олоҥхо толорооччу, норуот талааннааҕа НЮРГУЯНА КАПИТОНОВНА САВВИНОВА 55 сааһыгар аналлаах «Алгыспын аныыбын бар дьоммор» дьоро түһүлгэҕэ В.О. Каратаев аатынан Олоҥхо дьиэтигэр саха төрүт үгэстэрин сэҥээрээччилэр төбүрүөннээн түмүстүлэр.
Үбүлүөйдээх киһибит айар үлэтин, сылаас илиитинэн бигээн тикпит таҥастарын, оҥоһуктарын, уруһуйдарын быыстапкатын мустубуттар сэргии, сэҥээрэ көрдүлэр.
Нюргуяна Капитоновнаа аналлаах күнүн бар дьонун алҕаан-силээн саҕалаата. «Бүлүү долгуннара» норуодунай ансаамбыл (сал. Г.А. Народова) кыталык үҥкүүтүнэн киэргэттилэр.
Кини олоҕо арчылаах Алгыс, дорҕоонноох олоҥхо, кылыгырас кылыһахтаах тойук, ыпсарыылаах ырыа, хомуһуннаах хомус аргыстаах.
Бүгүҥҥү дьоро күн кини талба талаана, сатабыла арылынна. Айыы санаалаах Алгысчыт 2019 сылтан улууспут, куораппыт, улуус нэһилиэктэрин Ытык ыһыахтарыгар «Күнү көрсүү”, Эбэҕэ сүгүрүйүү, алаһа дьиэҕэ киириилэрин, тэрилтэлэр өрөгөйдөөх түһүлгэлэрин алгыы-силии сылдьар, сахалыы ньыманан эмтиир-томтуур.
Маны сэргэ В.О. Каратаев-Харатай Баһылай аатынан норуодунай кэлэктиибин олоҥхо толорооччута, тойуксута буолар, «Алгыс” түмсүү кырыымпаһыта, «Дорҕоон” этно-фольклорнай түмсүү хомусчута, “Иис абылаҥа” түмсүү иистээҕэ.
Бу киэһэ Нюргуяна быйыл төрөөбүтэ 165 сааһа бэлиэтэнэр Бүлүү аатырбыт олоҥхоһута Сэмэн Харатаайап – Ырыа Дыгыйар «Тоҥ Саар Бухатыыр” олоҥхотуттан быһа тардыыны толордо, сөбүлээн дьарыктанар бөлөхтөрүн кытта хомуска, кырыымпаҕа оонньоото. Хомуска доҕуһуоллатан П.А. Петров аатынан улуустааҕы киин балыыһа “Айар кут» фольклорнай ансамбыла (салайааччы С.П. Харлампьева тикпит таҥастарын көрдөрдө.
Бэйэтэ гитаранан “Оо, Бүлүү» диэн ырыаны ыллаата. Ырыаны «Ай-Лаана» бальнай үҥкүү ансаамбылын (салайаачы С.Е. Зинурова) үҥкүүһүттэрэ Клавдия Иванова, Василий Тутукаров үҥкүүнэн доҕуһуоллаатылар.
Нюргуяна Капитоновна куорат уопсастыбаннай олоҕор көхтөөх кыттааччы, анал байыаннай дьайыыга сылдьар Бүлүү улууһун уолаттарыгар көмө оҥорор “Харысхал” уопсастыба волонтера.
Бу дьоһун түһүлгэ уһулуччу суолталаах түгэнинэн Нюргуяна Капитоновна Саввинова ХАРЫСТААНА диэн сахалыы харысхал ааты ылыммыта буолар.
Үтүө-мааны биир дойдулаахпытын дьоро күнүнэн улуус баһылыгын э.т. И.И. Евсеев, Бүлүү куоратын баһылыгын э. т Н. В. Иванов, култуура сайдыытын уонна норуот айымньытын Оройуоннааҕы киинин методиһа Н.Н. Иванова, Н. И. Ылахова аатынан «Алгыс» национальнай- култуурунай киин дириэктэрин э. т. Р. А. Томскай, В. О. Каратаев аатынан олоҥхоһуттар уонна тойуксуттар “Аар Дьаҕыл” норуодунай кэлэктииптэрин салайааччыта С. Т. Иванова, дьарыктанар бөлөхтөрүн салайааччылара А.П.Евсеева, Н.Ю. Корякина, С.И. Сыроватская, С.П. Харлампьева, үлэлээбит “Сельховодмелиорацията” аймахтара, дьүөгэлэрэ эҕэрдэлээтилэр.
Нюргуяна Капитоновна биһирэмнээх түһүлгэтин үөрэн-көтөн, бар дьонугар махтанан алгыстаах оһуокайынан түмүктээтэ.
Айылҕа маанылаах кыыһа, хомуһуҥ хоҥкунас тыаһыгар, кырыымпаҥ кылыгырас ырыатыгар, тойугуҥ тохтор дорҕоонугар, ииһиҥ дьэрэкээн сэһэнигэр бигэтэн этэҥҥэ сырыт!
Надежда Иванова,
Саха Өрөспүүбүлүкэтин култууратын үтүөлээх үлэһитэ,
Арассыыйа суруналыыстарын Сойууһун чилиэнэ