“Удьурҕай Боотур” остуоруйа-олоҥхонон ойууламмыт хартыыналар быыстапкаҕа турдулар

Арассыыйа худуоһунньуктарын сойууһун чилиэннэрэ, норуот маастардара, Амма улууһуттан төрүттээх Николай Рязанскай, Ньургуйаана Никифорова-Ойууна уонна Ульяна Нохсорова быыстапкалара Ф.Потапов аатынан Норуот айымньытын дьиэтигэр тэрилиннэ.

Үөрүүлээх тэрээһиҥҥэ СӨ култуураҕа уонна духуобунай сайдыыга миниистирэ Афанасий Ноев, СӨ Ил Түмэнин бэрэссэдээтэлин бастакы солбуйааччы, Олоҥхо кэмитиэтин бэрэссэдээтэлэ Александр Жирков, СӨ национальнай архыыбын дириэктэрэ Петр Румянцев, СӨ Дархан этээччитэ, СӨ култууратын туйгуна, олоҥхоһут Виталий Никифоров, Амма улууһун баһылыгын социальнай боппуруостарга солбуйааччы Нюргуяна Илларионова кыттыыны ыллылар.

— Мин «Удьурхай Боотур» хартыынан олоҥхо-остуоруйабын Аммаҕа ыытыллар Олоҥхо ыһыаҕар анаан-минээн 8 ый устата суруйдум. Онон бу иннинэ дьон дьүүлүгэр, сыанабылыгар тахсыбатах үлэм интэриэһи тардыа диэн эрэнэбин,- диир ЮНЕСКО худуоһунньуктар федерацияларын кыһыл көмүс мэтээлин хаһаайына Николай Рязанскай.

« Кэрэхсэбиллээҕэ диэн, Николай Рязанскай хартыыналара QR-кодтаахтар, ону баттаан,  худуоһунньук балта Наталия Рязанская ааҕыытыгар олоҥхоттон быһа тардыылары истиэххэ сөп”, — диэн бэлиэтээтэ СӨ култуураҕа уонна духуобунай сайдыыга миниистирэ Афанасий Ноев.

Култуура министиэристибэтин хаартыскалара.