Кымыс иһиитин сиэригэр-туомугар үөрэттибит

Кулун тутар 14-17 күннэригэр Өймөкөөн улууһугар, Олоҥхо ыһыаҕар бэлэмнэнии үлэ чэрчитинэн, Уус Ньара уонна Томтор нэһилиэктэригэр  «Олоҥхо ХVI ыһыаҕа Өймөкөөҥҥө: Айыы санаа айана» өрөспүүбүлүкэтээҕи научнай-методическай кэмпириэнсийэ буолан ааста. Барыта 16 улуустан уонна Дьокуускай куораттан 900-чэкэ киһи кэлэн кытынна.

 Сарсыардаттан ыалдьыттар, тэрийээччилэр, олохтоохтор Томтор орто оскуолатыгар лыык курдук муһуннулар. Спорт саалатыгар уус-уран оҥоһуктар быыстапкалара тэриллибит: манна сувенир эгэлгэтэ, үрүҥ көмүһүттэн саҕалаан быһаҕар тиийэ баар. Атын улуустартан эмиэ кэлитэлээбиттэр.

 Уус Ньара баһылыга Иван Егорович Максимов эппитинэн, Өймөкөөҥҥө төрүт култуураҕа төннүү, сэргээһин кэнники 10-15 сылга эрэ улааппыт, онон билбэттэрэ-көрбөттөрө олус элбэҕин туһунан кэпсээтэ. Улуус үрдүнэн саха ахсаана 2,5 тыһыынча  эрэ курдук эбит. Сэттэ нэһилиэктэн саамай улаханнара — 1 тыһыынча нэһилиэнньэлээх Томтор. Сордоҥноох, Өймөкөөн, Төрүт нэһилиэгин баһылыктара эмиэ олус  көхтөөхтүк кытыннылар.

Иван Семенович биһикки ыһыах биир тутаах тутулун — кымыс иһиитин үгэһин уонна тэрээһинин үөрүйэхтэрин туһунан кэпсээтибит. Өймөкөөн улууһугар биэни ыаһын умнуллубут дьарык эбит. Ону Олоҥхо ыһыаҕар диэри сөргүтэр сорук турар. “Ытык ыһыахха биэ үүтүттэн оҥоһуллубут кымыһынан Айыылары, сири-уоту күндүлээтэххэ, ыһыах соруга ситэр” диэн санааны тиэртибит, ону ылыннылар.

Борис БОРИСОВ,

ааптар хаартыската.