Олоҥхо ыһыаҕа Нерюнгригэ ыытыллыаҕа
Ил Дархан Айсен Николаев Нерюнгригэ оробуочай сырыытын кэмигэр 2025 сылга ыытыллыахтаах Олоҥхо ыһыаҕар бэлэмнэнии боппуруостарын көрдө. Ыһыах ыытыллыахтаах сиригэр — хайыһар баазатыгар — сырытта.
Ил Дархан ыһыах ыытыллыахтаах сирин, түһүлгэлэр, ураһалар былааннарын, Аал Луук Мас тутуллуохтаах миэстэтин билистэ.
Нерюнгри оройуонун баһылыга Роман Щегельняк ыһыах ыытыллыахтаах сирэ инникитин олохтоохтор сынньанар миэстэтигэр кубулуйуохтааҕын эттэ. Билигин манна номнуо үлэ саҕаланан, киирэр суолу кэҥэтии ыытыллар.
Маны таһынан ыһыах кэнсиэпсийэтэ «Пока cтоят священные горы – мир не рухнет» диэн бырайыага торумнанар.
Айсен Николаев кэпсэтии түмүгүнэн, ыһыах ыытыллар күннэрин, тэрийэр-техническэй былааны оҥорон киллэрэргэ эттэ.
Андрей Сорокин түһэриитэ
Елена Потоцкая