Майа лиссиэйигэр Олоҥхо дьоро киэһэтэ

Майа нэһилиэгин  И.Г. Тимофеев аатынан лиссиэйигэр Олоҥхо декадатыгар анаммыт тэрээһин өрө көтөҕүллүүлээхтик барда.

 Лиссиэй медиатекатын иһинэн утумнаахтык ыытыллар “Родничок”  литературнай кулууп орто кылаас оҕолоругар анаан Олоҥхо дьоро киэһэтин тэрийдэ.

Биллиилээх олоҥхоһут  Н.И. Степанов- Ноорой сиэнэ, «Саха сирэ » көрдөрөр-иһитиннэрэр хампаанньа ыыппыт  өрөспүүбүлүкэтээҕи  «Олоҥхо-баттл» интерактивнай күрэх кыайыылааҕа Аксиния Степанова күндү ыалдьыт буолла.

Кини хомустаан, олоҥхолоон, оҕолор куттарын тутта, сүргэлэрин көтөхтө. Олоҥхо умсулҕаннаах эйгэтин устун ахсым айаны бэлэхтээтэ. Оҕолор махтаннылар, «Күн Эрили» олоҥхо ис хоһоонун ырытыстылар. Чуолаан VII кылаас үөрэнээччилэрэ Олесов Слава, Лепчиков Костя  санааларын сайа эттилэр.

Маны таһынан, олоҥхо дьыктаана ыытылынна.

Улуустааҕы олоҥхоҕо аналлаах өйтөн суруйуу күрэҕэр оҕолор уран тылга  күрэхтэстилэр, элбэх литератураны хасыһан, билиилэрин хаҥаттылар, сорохтор кылбар кыайыы амтанын билэн үөрдүлэр-көттүлэр.

Олоҥхо декадатын тэрийээччилэрэ саха героическай эпоһа лицеистэр болҕомтолорун тардыбытын – сыал сиппитинэн аахтыбыт. Үөрэнээччилэргэ олоҥхо муударастарын, ураты тыынын, кэрэ кэпсээнин иҥэриммиттэрэ олохторугар бөҕө тирэх буолуо диэн  эрэннибит.

М.Г. Петрова, Майа лиссиэйин  саха тылын, литературатын учуутала