Хаҥаласка Олоҥхо декадатын аһыллыыта

Сэтинньи ый 25 күнүгэр сылын ахсын Саха Өрөспүүбүлүкэтигэр Олоҥхо күнэ бэлиэтэнэр.

Быйылгы сэтинньи 26 күнүгэр “Саргы Түһүлгэтэ” култуура уонна норуот айымньытын киинигэр Олоҥхо декадатын үөрүүлээх аһыллыыта улууспут бастыҥ фольклорнай кэлэктииптэрэ, олоҥхону толорооччулар, үйэтитээччилэр уонна уран уустар, иистэнньэҥнэр быыстапкалара кыттыылаах дьоллоох түһүлгэ олохтонно.

Олоҥхо күнүгэр анаммыт түһүлгэ сахалыы сиэринэн алгыһынан саҕаланна. Алгыс туомун толордо Хаҥалас улууһун Дархан оһуокайдьыта, тумус туттар киһибит Андриан Семенович Белолюбскай.

 Тэрээһин үөрүүлээх чааһа Хаҥалас улууһун Олоҥхо Ассоциациятын бэрэссэдээтэлэ Лидия Васильевна Харитонова ассоциация сыллааҕы үлэтин сырдатар дакылаатыттан саҕаланна, ону таһынан Хаҥалас улууһун култуураҕа уонна духуобунай сайдыыга салалтатын салайааччыта Сергей Альбертович Павлов эҕэрдэ тылынан уонна быйылгы дьылга Амма улууһугар XVII төгүлүн  ыытыллыбыт Олоҥхо ыһыаҕыгар улууспутун аатырдан кэлбит кыттааччылары эҕэрдэлээн, улуус дьаһалтатын, култуура уонна духуобунай сайдыы салалтатын аатыттан Махтал суруктары туттарда. 

Тэрээһин эҕэрдэ кэнсиэрэ үгэс курдук олоҥхону олоҕурбут ньыманан толорор “Хаҥалас утума” бөлөҕө түөлбэ олоҥхоһут Афанасий Николаевич Алексеев “Хаҥалас Боотур” олоҥхотуттан быһа тардан толордо.

Ону тэҥэ Мохсоҕоллоох бөһүөлэгин “Иһирэх” түмсүүтэ, салайааччы Мария Петровна Нератова, Өктөм нэһилиэгин “Сардаҥа” фольклорнай бөлөҕө, салайааччы Любовь Моисеевна Кондакова,  Покровскай куорат “Ай-ситим”  фольклорнай бөлөҕө, салайааччы Изольда Степановна Максимова,  кыттыылаах эҕэрдэ кэнсиэр буолла.

Түгэнинэн бэлиэтээн тэрээһиҥҥэ кыттыспыт биир дойдулаахтарбытыгар махталбытын биллэрэбит. Устар ууну сомоҕолуур улуу олоҥхобут үйэттэн үйэҕэ төннөр төлкөлөммөккө туругура турдун!