Олоҥхону олоҕурбут ньыманан толоруу күрэҕэ
Сатаҕай Е.А. Шишигин аатынан орто оскуолатыгар улуустааҕы кэтэхтэн Ааҕыы күрэҕэ ыытыллан түмүктэр таҕыстылар. Тэрээһин Олоҥхо сылын түмүктүүр биир улахан тэрээһининэн буолар.
Былыргы дьыллар былдьаһыктаах мындааларыгар, урукку дьыллар охсуһуулаах уорҕаларыгар тыйыс дойдуну уһун тыыннаабыт, сылаас эркиннээбит, саха омук уйгулаах олоҕу уһанарыгар төһүү буолбут олоҥхобутун өрө тутар туһаанаах сылбыт түмүктэнэн эрэр.
Ол курдук биһиги оскуолабытыгар Олоҥхо сылын түмүктүүр биир улахан тэрээһининэн тэрийэн ыыппыт улуустааҕы ааҕыы күрэхпит буолла. Олоҥхону олоҕурбут ньыманан толорууну видеоҕа устан, элбэх оскуолаттан үлэлэр киирдилэр. Барыта 47 кыттааччы кыттыыны ылла. Бу тэрээһини тэрийсибит оскуола бибилэтиэкэрдэригэр, оҕолор салайааччыларыгар махталбытын биллэрэбит.
Бөлөҕүнэн толорууга 1 миэстэни ыллылар: Болугур орто оскуолатын 7-8 кылаас үөрэнээччилэрэ Юра Борисов “Кэскил бухатыыр” олоҥхотуттан (сал. Наталья Кузьмина, Зоя Корнилова), 1 миэстэ — Е.С. Никитина аатынан Алтан орто оскуолата, Саша Удин 3 кылаас, Трофим Яковлев 4 кылаас, Эрсан Ермолаев 2 кылаас, “Баһырҕастаах аттаах Баабый Баатыр” олоҥхоттон толордулар (сал. Акулина Неустроева, Альберт Неустроев). 2 миэстэни ыллылар: Соморсун орто оскуолатын 1 кылааһын үөрэнээчилэрэ “Тойон Дьаҕарыма” олоҥхоттон (салайааччы Светлана Андросова), Чакыр орто оскуолатыттан 3 кылаас үөрэнээччилэрэ “Баһырҕастаах аттаах Баабый Баатыр” олоҥхоттон ( сал. Анна Павлова), 3 миэстэни ыллылар: Е.С.Никитина аатынан Алтан орто оскуолатын 1 кылааһын үөрэнээччилэрэ Сивцев Уйгун, Адамов Егор “Дуолан Баай Тойон. Арҕас Баай Хотун” олоҥхоттон (сал. Тамара Оконешникова), Е.Л. Чистяков аатынан Майскай орто оскуолатын үөрэнээччилэрэ Ася Стручкова 2 кылаас, Захар Захаров 4 кылаас, Рома Мартынов 2 кылаас “Эрчимэн Бэргэн” олоҥхоттон аахтылар (сал. Юлия Михайлова).
Биирдиилээн толорууга 1 миэстэни М.Н.Сибиряков аатынан Сэргэ-Бэс оскуолатын 1 кылаас үөрэнээччитэ Сайаана Софронеева (сал. Анастасия Михайлова), 2 миэстэни Чакыр орто оскуолатын 6 кылаас үөрэнээччитэ Новиков Айуол Т.З.Чээбий “Ала Булкун бухатыыр олоҥхоттон “Өһөх Дьайаан” ырыатын толордо (сал. Сардана Романова), 3 миэстэни М.Н.Сибиряков аатынан Сэргэ-Бэс оскуолатын 1 кылаас үөрэнээччилэрэ Алина Фомина “Аландаай Куландаайы”, Ян Слепцов “Уол оҕо барахсан” олоҥхоттон быһа тардан толорон. Салайааччылара Анастасия Михайлова.
Бары кыайыылаахтары истиҥник эҕэрдэлиибит!
Христина СКРЯБИНА,
Сатаҕай орто оскуолатын педагог — бибилэтиэкэрэ