Уһуйааннар олоҥхо 208 оонньуурун тэлгэттилэр

Олоҥхо декадатын чэрчитинэн «Сэргэлээх уоттара» култуура киинигэр «Олоҥхо оонньуурдара уонна оонньуулара» диэн уһуйааннар икки ардыларыгар өрөспүүбүлүкэтээҕи төрүт үгэстэри, үлэни сырдатар улахан күрэх ыытылынна.

Дьокуускай куорат 17-с нүөмэрдээх «Күнчээн» уһуйаанын иитээччитэ Екатерина Винокурова:

— «Олоҥхо ыллыктарынан айан» диэн хамсаныылаах, сиргэ оонньонор оонньууну оҥорон кытта сылдьабын. Олус интэриэһинэй оҥоһуктары көрөн, сүргэбит көтөҕүлүннэ. Хас биирдии оҕо тэрилтэтигэр төрүт үгэспитин сайыннарар, оҕоҕо тиэрдэр, үөрэтэр маннык оонньуулар ирдэниэхтээхтэр диэн түмүк санааҕа кэллим.

Бэйэ оҥоһук күрэҕэр барыта 208 үлэ сыаналаммытыттан, 91 үлэ иккис түһүмэххэ киирдэ.

Мастан, кумааҕыттан, таҥастан, кыыл тириититтэн, муостан, уҥуохтан, хатыҥ туоһуттан, итиэннэ сап арааһыттан оҥоһуллубут араас оонньуурдар дьон сэҥээриитин ыллылар.

Кэскиллээх тэрээһини Өрөспүүбүлүкэтээҕи «Олонхо ассоциацията» уопсастыбаннай тэрилтэ уонна «Арылы кустук» үөрэхтээһин уопсастыбаннай ситимэ кыттыһан тэрийдэ.

Валентина Догоюсова