Эдэр ыал Шестаковтар дьиэлэригэр олоҥхо дьоро киэһэтэ
Таатта нэһилиэгин эдэр ыала Шестаковтарга сахалыы тыыннаах ураты иһирэх күн буолла. Ол курдук кинилэр алаһа дьиэлэригэр Таатта нэһилиэгин бочуоттаах олохтооҕо, Көһөҥө Бүөтүр аатынан стипендия хаһаайына, олоҥхону толорооччу Раиса Семеновна Маркова ыалдьыттаата.
Мааны ыалдьыты эдэр ыал, былыргы үгэһинэн, остуол хотойорунан баай сандалы тардан, үөрэ-көтө көрүстүлэр.
Раиса Семеновна Ийэ олоҥхоһут Бүөтүр Решетников – Көһөҥө Бүөтүр “Дьураа маҥан аттаах Айыы Дьураҕастай бухатыыр” омуннаах-төлөннөөх алыптаах олоҥхотун толордо. Кини олоҥхо уран тылынан этэн-тыынан, үс хаттыгастаах олоҥхо дойдутугар оргууй сиэтэн киллэрдэ. Сыыйа омуна-төлөнө күүһүрэн, ойуулуур-дьүһүннүүр сатабыла уохтанан, этэрэ-тыынара иччилэнэн, көрөр харахтара уоттанан, бэл, хас биирдии толорор дьоруойун сэбэрэтин кэтэн уларыйарга дылы буолла. Мустубут дьон оҕолуун, улахан дьоннуун олоҥхо умсулҕаныгар ылларан, дуоһуйа олорон иһиттибит.
Түмүккэ «Сарыал» КК үлэһиттэрэ Раиса Семеновнаҕа саха төрүт үгэһин тэнитиигэ, барҕардыыга, туохха да тэҥнэммэт кылаатын, эдэр ыал Шестаковтар солун бырайыагы өйөөбүттэрин иһин истиҥник махтаннылар.
Инникитин ыал-ыал аайы саха Олоҥхото дуорайа, сэҥээрэр чуор кулгаахтар эбиллэ турдунар!