Сунтаарга «Оҕо уонна олоҥхо» айар түмсүү түһүлгэтэ
С.А.Зверев- Кыыл Уолун УНАК «ОҔО УОННА ОЛОҤХО» улуустааҕы айар түмсүү түһүлгэтин тэрийдэ. Манна сүрүннээн ыччаты олоҥхоҕо сыһыарыы уонна Олоҥхо дьиэлэрин үлэтин-хамнаһын туһунан кэпсэттилэр.
Улууска олоҥхо тула үлэлиир дьон, олоҥхону үөрэтээччилэр, култуура үлэһиттэрэ мустан, киэҥ далааһыннаах кэпсэтии олохтоотулар. Дьокуускай куораттан СӨ култуураҕа уонна духуобунай сайдыыга министиэристибэтин геокультурнай сайдыы институтун директорын солбуйааччыта Сардана Брызгалова “Биир ситим Олоҥхо дьиэлэрэ оҕону кытта үлэлэрэ»,
геокультурнай сайдыы институтун проектнай үлэлэргэ салаатын исписэлииһэ Евстафий Приблых «Олоҥхо дьиэлэрэ быыстапка хайысхатынан үлэлиир ньымалара» диэн тиэмэлэргэ иһитиннэрии оҥордулар.
Ону таһынан, “Олоҥхо дьоруойдарын уобарастарын куукула оҥоһуктарынан дьүһүйүү» хайысхаҕа С.А.Зверев- Кыыл Уолун «Кулан Кугас аттаах Куллустай Бэргэн» олоҥхотунан «Иккис тыын» Сунтаар куукула оҥорооччуларын түмсүүтэ оҥорбут үлэлэрин дьон көрүүтүгэр туруордулар. “Олоҥхону араас ньымаҕа киллэрэн сайыннарар хайысхалары тобулуу» диэн кэпсэтиигэ олоҥхону туруорууга араас ньымалар тустарынан кэпсэттилэр. «Анимационнай киинэлэр күрэстэригэр» Сунтаар улууһун үөрэҕин тэрилтэлэрэ оҥорбут ойуулуктарын көрдүлэр, сыаналаатылар. Бу хайысхаларынан арахсан санаа үллэстиитэ буолла.
“Оҕо уонна Олоҥхо” бырайыак ааптара, айар түмсүүнү төрүттээччилэртэн биирдэстэрэ, олоҥхоҕо уһуйааччы Туяра Алексеева өр сылларга оҕолору кытта үлэлээбит баай уопутун үллэһинэ: “Саха норуотун уус уран айымньыларын үүнэн эрэ көлүөнэҕэ үөрэтээччи киһиэхэ бу бырайыакпын олохтуурбар үөрэнээччилэрим ситиһиилэрэ кынаттаабыта. Бастаан утумнаахтык үлэлиирбэр уһуйаан оҕолоруттан уонна иитээччилэриттэн саҕалаабытым. Онтон улам оскуола оҕолоругар олоҥхону, саха фольклорун үөрэтэн барбытым. Билигин номнуо бу оҕолорум улаатан обургу саастаннылар. Ситимнээхтик үлэлээбитим түмүгүнэн үөрэппит оҕолорум олоҥхо ис тутулун өйдөөн сүдү айымньыны улахан сыанаҕа туруорарга холоннубут ”.
“Оҕо уонна Олоҥхо” бырайыак чэрчитинэн С.А.Зверев-Кыыл Уола “Кулан Кугас аттаах Куллустай Бэргэн” олоҥхотун Сунтаар оскуолаларын үөрэнээччилэрин толоруутугар көстүөҕэ. Манна сүрүннээн Сунтаар 3-с №-дээх оскуолатын үөрэнээччилэрэ кыттыыны ылыахтара.
Мира АФАНАСЬЕВА, «Сунтаар сонуннара»
