Улуу Сибиэрэпкэ аналлаах тэрээһинтэн дуоһуйа астынным

Дойдум Сунтаарым дьонун кытары алтыһан, оҕо сааспын санаан, эдэр кэммин эргитэн, биир кэмҥэ үлэлээбит үөлээннээхтэрбин көрсөн, олус диэн долгуйдум, үөрдүм.

Түбэйим, Түбэй Дьаарханым — үлэлээн, олорон ааспыт, өйдүү-саныы сылдьар дойдум. Киһи сааһырдаҕын аайы дойдута, дойдутун дьоно ордук күндүтүйэн иһэр эбит.

Бэҕэһээ Улуу киһибит Сергей Зверев-кыыл Уола үбүлүөйдээх сылын сунтаардар Дьокуускайга кэлэн олус да бэркэ тэрийэн ыыттылар. Манна бука бары сүргэлэрэ көтөҕүллэн, сырдык мичээринэн сыдьаайан, бу курдук биир күн түөлбэлээн көрсөрбүт олус да үчүгэй. Эдэр эмэн, оҕо мустан биир тыыҥҥа киирэн бука бары төрөөбүт дойдубут ахтылҕанын таһааран аастыбыт. Ыраах сытар дойдубут тыына ил гынна.

Сунтаар ааттыын да олоҥхо дойдута. Дьокуускайга улууспут талааннаах дьоно кэлэн, араас дьикти оҥоһуктары көрдөрөн, сахалыы таҥас арааһын туруоран, ыллаан-туойан, оһуокайдаан тоҕуоруһан олус үчүгэй бырааһынньыгы тэрийдилэр. Бу күн Улуу киһибитин Аар тайҕаҕа сураҕырбыт, аата умнуллубакка илдьэ сылдьар киһибит Кыыл Уола Сэргэй Сибиэрэп аатын-суолун чиэстээн аастыбыт.

Сунтаар сириттэн кэлэн дьону-сэргэни сэргэхсиппиккитигэр махтал бастыҥа буолуохтун. Бүтүн өрөспүүбүлүкэ устун салгыы маннык тэрээһиннэр суоллара аһылыннаҕа буоллун. Тэрээһин үрдүк таһымҥа барда. Бука бары кыттыбыт, тэрийбит дьоҥҥо өссө үрдүктэн үрдүк ситиһиилэри, тэтимҥитин ыһыктыбакка салгыы баран иһиҥ. Дьоҥҥо-сэргэҕэ билиһиннэриҥ. Үөрүү көтүү көтөллөнүҥ.  Бу бэйэм кыракый санааларбын тистим.

https://vk.com/video_ext.php?oid=-211618372&id=456239354&hash=ef2ea51417492422

Каджана ЕВСЕЕВА-Чэлгийэ