КЫЫЛ УОЛУН СЫЛА САҔАЛАННА!
Тохсунньу 30 күнүгэр Өксөкүлээх аатынан култуура уораҕайыгар күнүс 3 чаастан сунтаардыы оһуокай дуорайда, олохтоох ас-үөл, уус-уран оҥоһук атыыта тэнийдэ. Дьон саҕаланыаҕыттан тобус-толору, мин хойутаан тиийэн хата биир түһүлгэҕэ эргийсэн хааллым. Оһуокай быыһыгар кэнсиэр чэрчитигэр хабыллыбатах талба талааннаахтар ырыаларын-тойуктарын эмиэ иһиттибит.
🌈18:00 ч УЛУУ КИҺИ УТУМА диэн үс чаастаах кэнсиэри көрөөччү утаппыттыы, хас биирдии толорууну дохсун ытыс тыаһынан уруйдаан көрүстэ, айхалынан атаарда. Кэнсиэри эдэр олоҥхоһут Айсен ФЕДОРОВ “Сарсын-сарсын сарсыардатынан”, кырдьык да, улуу киһини утумнааччы баарын итэҕэтэрдии иэйэн-куойан толордо. Тойук умсулҕаннаах долгунун бөлөх толорооччулар хаба тардан ылар кэмигэр экраҥҥа Сунтаар үрдүнэн күн кылбайан тахсан эрэрэ көһүннэ, тойук бүтэригэр күммүт саҕах үөһэ тэмтэйэ кыыһан, бары да бэс ыйыгар ыһыахха сылдьан алгыс ылбыттыы, көмүс күнү көрсүбүттүү долгуйа түстүбүт. Бу аартык арыйар тойугунан мин Түбэйим Светлана ЗЕДГЕНИДЗЕВА салайааччылаах хотун далбардара, кылыһахтаах кыргыттара КЫЫЛ УОЛА төрөөбүт нэһилиэгин аатын дорҕоонноохтук бигэргэттилэр.
🌈Ырыалаах Ыгыаттаттан кэлбит ытык уоту улуус баһылыга Анатолий ГРИГОРЬЕВ СӨ култуураҕа уонна духуобунай сайдыыга миниистирэ Афанасий НОЕВКА туттарда. Миниистир С.А. ЗВЕРЕВ төрөөбүтэ 125 уруйдаах сыла саха төрүт култууратыгар уонна идэлээх искусствотыгар саҥа айымньыларынан бэлиэтэниэ, омук быһыытынан туругуруу биир кэрэ кэрчигинэн буолуо диэн иһирэх санаатын тиэртэ.
🌈Дьоро киэһэ көстүүтүн Сунтаар улууһун уран куттаах дьоно, үҥкүүтүн, тойугун-ырыатын ансаамбыллара сүрүннээтилэр, КЫЫЛ УОЛУН аатынан Төрүт Үҥкүү тыйаатыра, төрүт дорҕоон аркыастыра, Олоҥхо тыйаатыра, ХИФУ, култуура кэллиэһин ансаамбыллара, Мэҥэ Хаҥалас “Кыталык” ансаамбыла байыттылар, киэргэттилэр. Бу дьоро киэһэҕэ сылдьыбыт дьон бары ОҺУОР ҮҤКҮҮТЭ саха үҥкүүтүн ийэтэ буоларыгар итэҕэйдэ. Үҥкүү, айааччы бэйэтэ туруорбут классикалыы көрүҥүттэн сүрүн иэйиитин сүтэрбэккэ эрээри, саҥа көрүүлээх хореографтар үлэлэригэр киирэн, кэми-кэрдиини нөҥүөлүү турара көһүннэ.
🌈Композитор Марк ЖИРКОВ “С.А. Зверев айаҕынан ыллаан биэрбититтэн бастакы опера, балет музыкалара тахсыбыттара… Кини илиитинэн-атаҕынан көрдөрбүтүттэн бастакы үҥкүүлэр чочуллубуттара… Кини биэрэрэ өссө да баһаам элбэх, ону биһиги кыайан сүһэн ылбакка хаалан эрэбит…” диэн билиниитэ сурукка-бичиккэ тиһиллэн сылдьар. КЫЫЛ УОЛУН курдук омугун уратылаах сиэрин туруулаһар сүҥкэн киһи баар буолан, Саха сирин үрдүнэн Сунтаар ыһыаҕа саха омук төрүт түһүлгэтин быһыытынан арыыланан, араҥаччыланан, тыыннаах хаалан, ыһыах Саха сирин үрдүнэн билигин иккистээн ньиргиччи тиллэр кыаҕын ылла. Төрүт айымньы хаалынньаҥынан аатырар кэмигэр айбыт, үлэлээбит улуу киһи олоҕун суолтата, аата-суола сүүрбэһис үйэҕэ саха өркөн өйдөөхтөрүн иитэлээн таһаарбыт норуот учуутала Мэхээлэ Алексеевы, саха күлүмэх күүстээхтэрин эрчийэн таһаарбыт улуу тренер Миитэрэй Коркины кытта саха айылгылаах кутун-сүрүн харааннаан хаалларан, ыччакка тиэрдибитинэн тэҥҥэ турар. Ону толору билиниигэ Өрөспүүбүлүкэ үрдүкү салалтатын дьаһаллара тахсан эрэллэрэ үөрүүлээх.
САЙА