Олоҥхоһут Оҕотоойоп төрөөбүтэ 115 сыла
Биир дойдулаахпыт, кыраайы үөрэтээччи, олоҥхоһут, Саха АССР оскуолаларын үтүөлээх учуутала Петр Васильевич Оҕотоойоп төрөөбүтэ 115 сылын туолла.
Таатта улууһун Арылыйа устар ыраас уулаах Амма эбэ кытыытыгар турар Төрүт учаастагар Петр Васильевич 1910 сыллаахха кулун тутар 10 күнүгэр күн сирин көрбүтэ.
1956 сыллаахха Дьокуускайдааҕы педагогическай үнүстүүт филологичскай бакылкыатын нуучча тылын уонна литературатын салаатын бүтэрбитэ. Иитэр-үөрэтэр үлэтин Уус Маайа улууһугар 1933 сыллаахтан саҕалаабыта. Учууталынан үлэлээбит 44 сылыттан 24 сылын Уус Алдан улууһун Лөгөй оскуолатыгар оҕолору үөрэтэргэ-иитэргэ анаабыта. Нуучча тылын үөрэтиигэ лиссиэй ньыматын туһаммыта биллэр.
Тус үлэтигэр дьүөрэлээн, норуот номохторун хомуйан, сурукка тиһэрэ, ону таһынан айылҕаттан айдарыылаах киһи олоҥхоҕо эмиэ холоноро. Кини суруйан хаалларбыт «Эһэ Хара аттаах Элэс Боотур» олоҥхото 2002 сыллаахха үс тылынан, сахалыы, нууччалыы уонна аангылыйалыы тылларынан, бэчээттэнэн, киэҥ эйгэҕэ тахсыбыта. Бу олоҥхону араас улуус олоҥхоһуттара уонна эдэр ыччаттар сөбүлээн толороллор.
2010 сыллаахха, Петр Васильевич төрөөбүтэ 100 сылыгар анаан, Төрүккэ скульптор уола Егор Петрович Оҕотоойоп аҕатыгар өйдөбүнньүк туруорбута.
Биир дойдулаахпыт аата үйэтитиллэриттэн үөрэбит, киэн туттабыт.
- Сырдатта Сардаана Васильева, Харбалаах, Таатта