Кэмпэндээйигэ — «Кулан кугас аттаах Куллустай Бэргэн» олоҥхо испэктээк

Кулун тутар 14 күнүгэр Cунтаар улууһун Кэмпэндээйи нэһилиэгэр «Сайдыы» култуура киинигэр Сунтаардааҕы 3-с нүөмэрдээх оскуола үөрэнээччилэрэ С.А.Зверев-Кыыл Уолун «Кулан кугас аттаах Куллустай Бэргэн» олоҥхотунан испэктээк көрдөрдүлэр.

Испэктээккэ С.А.Зверев-Кыыл Уолун аатынан Норуот айымньытын киинин «Эйгэ» фольклорнай бөлөҕө ( сал. Алексеева.Т.А, Иванова С.М.), » Пульс» ( сал.Чжан.Н.А.), «Түһүлгэ» ( сал.Лазарева М.В) үҥкүү бөлөхтөрүн оҕолоро кытыннылар.

Туруорааччы режиссер — Т.Н. Заровняева.

Маны таһынан СӨ норуотун маастара И.И. Иванов мас оҥоһуктарын быыстапкатын тэрийдэ.

Бастаан утаа уот баран, 1 чааһынан хойутуу кэллэ. Ол да буоллар, оҕолор ыһыллан хаалбаккалар, тулуурдаахтык көстүүмнээх күүтэн, испэктээҕи олох үрдүк таһымҥа көрдөрдүлэр.

Көрөөччүлэр олоҥхо көстүүмнэрин көрөн сөрү диэн сөхтүлэр .

Испэктээк көрө кэлбит кырачаан оҕолор чуумпуран олорон иһиттилэр.

«Уһун тылларын ким да умнубата, оруолларын сөпкө чаҕылхайдык арыйдылар», — диэн көрөөччүлэр биһирэбиллэрин ыллылар.

Кэмпэндээйи » Сайдыы» култуура аныгылыы саҥа кулуубун көрөн астынныбыт.

https://suntar-olonkho.saha.muzkult.ru/news сайтан