Туойдаахха Кыыл Уолун сыла “Олоҥхолоох айан” бырайыагынан саҕаланна

Саҥа сылы айхаллаан, үүммүт сылы уруйдаан, Туойдаах нэһилиэгэр сыл үөрүүлээх  аһыллыытыгар “Олоҥхолоох айан”  бырайыагынан  күндү ыалдьыт буолан тиийдибит.

Билэрбит курдук, быйылыгы сыл  Арассыыйаҕа Аҕа дойдуну, Саха сиригэр Ийэ дойдуну көмүскээччилэр,  Сунтаар улууһугар С.А. Зверев – Кыыл Уолун сылларынан биллэриллибитэ.

  Сибиэрэп киинин аатыттан Мария Афанасьевна Тараярова   тыл  эттэ, ол кэннэ Туойдаах нэһилиэгин олохтооҕо, олоҥхоһут Иван Данилович Павлов-Түүлээх Уйбаан “Ааттаах Аттаах Адаам Саар Бухатыыр” олоҥхотун Наталья Эконова быһа тардан толордо.

  Бу олоҥхо толоруллар уһуна  5-6 ч. кэриҥэ.   Аны кэлэр сылга дьону түмэр балаҕан үөрүүлээх аһыллыытыгар  Наталья бу олоҥхону толору толорорун былаанныыр.

Тэрээһин оһуокайынан түмүктэннэ. Оһуокайы фольклор исписэлииһэ  Яковлева Александра таһаарда.

Сунтаардааҕы Норуот айымньытын салаата.