Мааны сандалылаах Олоҥхо дьоро киэһэтэ
Бартыһааҥҥа «Кустаах» турбазаҕа самаан сайын кэлбитин уруйдуу, мааны сандалылаах Олоҥхо дьоро киэһэтэ буолан ааспыт.
Олоҥхону өрөспүүбүлүкэтээҕи «Олоҥхо дойдутун оҕотобун», «Муҥха олоҥхото», «Олоҥхо тойуга» бэстибээллэргэ Гран-при, Үөһээ Бүлүүгэ ыытыллыбыт Олоҥхо ыһыаҕар ыччат ортотугар олоҥхону толорууга Кылаан Кыайыылааҕа Яна Нюргусова толорбут.
Дьоро киэһэни олоҥхо театрын доҕуһуолдьута, саха үстүрүмүөннэринэн тута хоһуйааччы Айсен Кысылбаиков-Айыы Сиэнэ кырыымпа алыптаах тыаһынан киэргэппит.
Саха аһын мааны сандалыта бу күн хоточчу буолбут:
•туой саламаат,
•Айыы оттоох алаадьы,
•күөх лапсалаах кус миинэ,
•сэбирдэххэ сууламмыт собо,
•«Кустаах» фирменнэй салаата,
•«Кустаах» фирменнэй чэйэ.
•дыраһааҥкы минньигэс көрүҥнэрэ.
Маны барытын «Уйгулаах Ас» уонна «Отоһут лааппыта» бу дьоро күҥҥэ анаан астаабыттар. Ырысыаптаах аккырыыккалар, чэйдэр, маастар, арыылар атыыламмыттар.
Дьоро киэһэ күн көрсүүтүнэн солбуллубут.
Бу самаан сайын кэлбитин уруйдуур мааны сандалылаах Олоҥхо дьоро киэһэтин туһунан «Уйгулаах Ас» ханаал маннык суруйда:
«Үтүө күнүнэн күндү доҕоттор! «Кустаах» тэрээһинин туһунан сырдаттахха сатанар.
Хаһан да умнуллубат үтүө күннэр элэс гынан аастылар. «Кустаахха» кэлэн барбыт дьоҥҥо-сэргэҕэ махталбытын тиэрдэбит. Ыалдьыттар Чурапчы, Таатта сириттэн кытта кэлэн бардылар. Дьон кэлиэ дуо диэн долгуйбуппут, арай биир интэриэстээх дьонунан дьиэ-уот туолан хаалбытыттан, тэрээһин биир тыынынан ааспытыттан үөрдэхпиит!
«Кустаахтар» биһиэхэ олоҥхо киэһэтин ыытаары сылдьабыт, кэлэн кыттыаххыт дуо?» диэбиттэригэр, эрдэ эҥэрдэспит сирбит буолан, тута сөбүлэспиппит. Программабытын оҥорбутунан барбыппыт уонна иһирдьэнэн-таһырдьанан астаабыт аспыт барыта табыллыбытыттан, дьоммут астынан тарҕаспытыттан үөрүүбүт үгүс.
Бу киэһэ Яна Ньургусова олоҥхону толоруутун истэммит үйэ быыһа сэгэйдэ, көхсүбүт кэҥээтэ. Салгыы Айсиэн Кысылбаиков кырыымпатын тыаһынан дьиэ иһэ туола түстэ, элбэх дьиктилээх ох саа тыаһа кытта дьырылаата, куту-сүрү ыраастаата, бар дьон көрдөһүүтүнэн Күөгэйэ Дэгэйэ тойугун таһаарда.
Күндү дьоммутун тутан олорон дуоһуйа истэммит сүрдээҕин астынныбыт, үөрэн-көтөн тураммыт ис сүрэхпититтэн махтанабыт.
«Кубалаах кыргыттарыттан» Ирина уонна Розалия дириҥ ис хоһоонноох уран үлэлэрин билиһиннэрдилэр. Бу үлэ Сахаайабыт уруһуйдарын эскиһинэн тигиллэн тахсыбыта биир дойдулаахтарыгар, биһиэхэ доҕотторугар, өссө күндү буоллаҕа.
Олохтоох Далбар Хотуттар буруолатан, ыраастаан көрүстүлэр, нуурал эйгэни үөскэттилэр. Күн көрсүүтүн тэрийдилэр, алгыһы көтөхтүлэр, оһуохайынан ситимнээтилэр, биэ кымыһынан айах туттулар.
Көрсүһүү астык алтыһыы тэтиминэн ааста, санаа атастаһыыта, кэпсээнтэн кэпсээн тахса турда, истиҥ эйгэ илгийдэ. Онуоха «Кустаах» алыптаах айылҕатын сирин-дойдутун ил тыыннаах иччилэрэ, көмөлөһөр сырдык күүстэрэ, бары өбүгэлэрбит араҥаччылыы, көмөлөһө сылдьыбыттара саарбаҕа суох.