Олоҥхо суолунан Кэбээйигэ айан
«Удьурҕай Таатта» бөлөх айар-тутар, кэпсиир-ипсиир айана саҕаламмыта 10-тан тахса сыл буолла. Кэлиҥҥи 5 сылга «Олоҥхо суолунан айан» бырайыакка (сал. Акулина Егасова) кыттыһаммыт, сылдьар ыырбыт көхтөөхтүк кэҥээн биэрдэ.
Быйылгы олунньу 10-17 күннэригэр Кэбээйи улууһугар олоҥхо эйгэтигэр үлэлээн кэллибит. Айан барылыгар баар соруктары барытын олоххо киллэрэн кэллибит диир санаа киһини үөрдэр, сүрү күүһүрдэр.
Бастатан туран, тиийбит күммүтүгэр, олохтоох олоҥхоһут түөлбэлии олоҥхотун булан, бары саба түһэн, куолаан толоруу сценарийын оҥордубут.
Иккис күн кэлбит дьону кытта күүстээх дьарык ыытылынна. Олоҥхо персонажтарын түҥэтэн-ыллатан, олоҥхо тылын сэһэргиир киһини булан-талан, үлэбит күөстүү оргуйда. Ордук, дьон санаата-оноото бэттэх кэлэн, туох да толлугаһа суох, дорҕооннорго, кылыһах таһаарыытыгар сэргэхтик үлэлэстилэр. Дьарыктарбытыгар түөлбэ ырыатын-дорҕоонун олоччу уларыппакка, ыллыыр-туойар ньымаларын эрэ арыйдыбыт-үөрэттибит. Олоҥхо толоруутугар тардыһыылаахтарга, хас биирдии олоҥхо персонаһа хайдах ылланарын холобурдаан иһитиннэрдибит.
Уһуйааччылар тумус туттар киһибит Алексей Николаев, киниэхэ көмөлөһөөччүлэринэн Раиса Маркова, Николай Дьячковскай буолан үлэлээтибит.
Уһуйар дьарыктарбытыгар саастарыттан тутулуга суох кытыннардыбыт. Ол курдук улахан дьон, эдэр ыччат оскуола уонна «Кэскил» уһуйаан оҕолоро эҥкилэ суох сүбэни-аманы иҥэриннилэр.
Мустубут дьон бары кыттыһан, тугу сатыырбытынан, туохха үөрэммиппитинэн, билэрбитин-сатыырбытын барытын атастастыбыт-үөрэтистибит. Онно хомус тыаһа күөрэйдэ, сахалыы ырыа да ылланна, чабырҕах да хаалсыбата. Олоҥхо тула ыйытыктар, сэһэргэһиилэр да, дэлэйдик тэнийдилэр!
Ити курдук, Кэбээйи (Елизавета Софронеева), Чагда (Дима Игнатьев), Куокуй (Полина Борисова) нэһилиэктэригэр анаан-минээн ыҥырыынан айар-тутар соруктаах ыалдьыттаатыбыт.
Маастар кылаастарбыт Елизавета, Николай Софронеевтар үтүөкэн оҥоһуулаах саха балаҕаннарыгар тоҕуоруһан, туһалаахтык ыытылыннылар. Манна Мастаах, Тыайа, Арыктаах, Хаалбыс, Мукучу, Сангар бөһүөлэктэриттэн олоҥхоҕо чугастар, олоҥхону сэргээччилэр уонна истиэн-көрүөн баҕалаахтар сырыттылар.
Уһуйааччыларга, итиэннэ уһуйуллааччыларга ордук долгутуулаах күммүт үһүс күн буолла. Тоҕо диэтэххэ, икки күннээх үлэбит түмүгүн дьоҥҥо-сэргэҕэ таһаарыахтаах күммүт!
Сарсыардаттан балаҕан иһэ толору. Бэлэмнэнии, сибигинэһии, кэтэһии-манаһыы бөҕөтө буоллубут. Анал чааспыт кэлэн, 14 киһи кэккэлэһэн кэбистилэр уонна туох да тохтобула суох чуордук этэн-тыынан, тойуктаан кэбистилэр. Онтон бэйэлэрэ да соһуйдулар быһыыта. Чочуйуу, ырытыы, сүбэ-саргы буоллубут. Төгүрүк остуолунан ол курдук үлэбит түмүктэммитэ.
Ийэ тылын күнүгэр сөп түбэһиилээх олоҥхо суолунан айан астыктык ааста!
Кэнчээри ыччаттарбытыгар үтүө тылбыт, өркөн өйбүт, өбүгэ үгэстэрэ, үөрэхтэрэ быстыбатын туһугар барҕа санаабыт олоххо киирэриттэн дьоллонобут!
Раиса Маркова,
«Удьурҕай Таатта» бөлөх салайааччыта.