“Куйуур олоҥхотун” кыайыылааҕа — Арчыман Номоҕон

Уус Алдан улууһун Өлтөх нэһилиэгэр “Куйуур олоҥхото” өрөспүүбүлүкэтээҕи күөн күрэс буолан ааста. Биллэр олоҥхоһут, ССРС суруйааччыларын сойууһун чилиэнэ Дмитрий Михайлович Говоров-Олоҥхоһут Миитэрэй төрөөбүтэ 175 сылыгар ананна.

 “Куйуур олоҥхотугар” Мэҥэ Хаҥалас, Нам, Үөһээ Бүлүү, Таатта, Уус Алдан, Амма, Бүлүү улуустарыттан олоҥхоһут 7 бастыҥ ыччата түмсэн, оллоонноон олорон, өбүгэлэрин хаанын уһугуннаран, ыллаан-туойан, кэпсээн-ипсээн, дьону сэргэхситтилэр, олоҥхобут аны да кэлэр үйэлэргэ тыыннаах хаалар кэскиллээҕин бигэргэттилэр.

Хомоҕой тыллаахтар күрэхтэригэр Ил Түмэн бэрэссэдээтэлин бастакы солбуйааччы, СӨ Ил Дарханын иһинэн Олоҥхо национальнай кэмитиэтин бэрэссэдээтэлэ, “Аан дойду эпостара” норуоттар икки ардыларынааҕы ассоциация вице-президенэ Александр Николаевич Жирков, филологическай наука доктора, олоҥхону чинчийэччи, бэрэпиэссэр, СӨ наукатын үтүөлээх диэйэтэлэ Василий Васильевич Илларионов, этнопедагог, п.н.к. Галина Семеновна Попова-Санаайа кыттыыны ылбыттара – тэрээһини үрдүк таһымнаата. Манна даҕатан эттэххэ, бу “Куйуур олоҥхото” Санаайа ааптарыскай бырайыага буолар.

Икки күннээх бэстибээл түмүгэ маннык буолла:

 “Тэтими тутар олоҥхоһут” – Марфа Аммосова (Мэҥэ Хаҥалас);

“Кылыһах ырыалаах олоҥхоһут” – Ньургустаана Лебедева (Нам);

 “Уһун тыыннаах олоҥхоһут” – Анна Кириллина (Амма);

“Бастыҥ нооһут” анал аакка тигистилэр: Сибэкки Заровняева (Мэҥэ Хаҥалас), Вера Цыпандина (Нам), Сахаайа Колодезникова (Нам).

Бириистээх миэстэҕэ:

III миэстэ – Никита Аянитов (Үөһээ Бүлүү);

II миэстэ – Сайыына Шамаева (Бүлүү);

I миэстэ – Диана Петухова (Уус Алдан).

Кылаан чыпчаал — Арчыман Номоҕон (Таатта).

Арчыман Таатта Баайаҕатыттан төрүттээх. “Мандар Уус” саха олоҕун кэлим түмэлин үлэһитэ. Оскуола сааһыттан бэйэтэ ураты буочардаах хоһооннору суруйар.  

Бу бэстибээли “Ыччат олоҥхоһут” уопсастыбаннай түмсүү сүрүннээтэ. Быйыл саҥа анаммыт бэрэссэдээтэллэрэ, Олоҥхо тыйаатырын чаҕылхай артыыһа, “Олоҥхо-батлл” телевизионнай күрэс кыайыылааҕа, 5 сааһыттан олоҥхону толорор, билигин бэйэтэ айар Анастасия Алексеева, этэргэ дылы, сүрэхтэниитэ буолла.  

         Кыттыбыт уонна тэрийбит дьоҥҥо махтанабыт!