Олоҥхону толорууга уһуйан

Олоҥхо XVI ыһыаҕа буолара 100-кэ тиийбэт хонук хаалбыт! Онон сибээстээн бэлэмнэнии үлэтэ күүскэ бара турар.

Кулун тутар 14-17 күннэригэр Өймөкөөн улууһун Томторугар уонна Уус Ньааратыгар өрөспүүбүлүкэтээҕи научнай-методическай кэмпириэнсийэ ыытылынна.

 16 улуустан, Дьокуускай куораттан барыта 200 киһи кэлэн барда, 850 киһи маастар кылаастарга, кэпсэтиилэргэ кытынна. Улуустартан кэлбит дэлэгээссийэлэр ыһыах тэрээһинигэр көмөлөһөргө бэлэмнэрин биллэрдилэр.

Таатта улууһуттан 18 киһилээх, улуус баһылыгын солбуйааччы Алена Гуляева, норуодунай тыйаатыр начаалынньыгын солбуйааччы Марианна Степанова салайааччылардаах дэлэгээссийэ бу кэмпэриэнсийэҕэ ситиһиилээхтик кыттан кэллэ.

«Олоҥхо суолунан айан» бырайыак чэрчитинэн 5 сыл устата үлэлээбит бөлөх салайааччыта А.М. Егасова уонна олоҥхону толорооччулар А.Н. Николаев, Р.С. Маркова кэмпириэнсийэ «Олоҥхолооһун үгэһин сөргүтүү ньымалара» сиэксийэтигэр «Айанньыт олоҥхоһут суола билиҥҥи кэмҥэ» дакылаатынан истээччилэри сэҥээртибит.

Филологическай наука кандидата, олоҥхону толорооччу Юрий Петрович Борисов «Ааттаах олоҥхоһуттар аартыктарынан, ытык кырдьаҕастар ыллыктарынан»  бырайыагын билиһиннэрдэ.
Ытык кырдьаҕастар уһуллан хаалбыт олоҥхолорун ырыаларыттан дорҕооннору ырыттылар.

Ону таһынан олоҥхону толоруу ньымаларын ырытыыга маастар кылааска таатталар бэйэбит сатабылбытын билиһиннэрдибит. Салгыы ити үлэбитинэн  Томтор, Өймөкөөн, Сордоҥноох бөһүөлэктэргэ оҕолору, ыччаты, улахан дьону хабан, олоҥхо эйгэтинэн үлэлии сылдьабыт. 

Раиса Маркова, Таатта

Ааптар хаартыскалара