«Дьорҕостой Бэргэн» куукулаларын халбаакылар оҥордулар

Олоҥхо тыйаатыра Бүлүү улууһун Халбаакытыгар тиийэн, «Тускул» сынньалаҥ киинигэр Николай Шамаев-Чопчухаан «Дьорҕостой Бэргэн» олоҥхотун куукулаларынан туруоран көрдөрдүлэр.

«Дьорҕостой Бэргэн» олоҥхоттон испэктээги туруоруу Олоҥхо тыйаатыра Бүлүү улуустарынан «Олоҥхо дьиэлэрин ситимин тэрийии» диэн сырыытын чэрчитинэн тэрилиннэ. Испэктээги Гаврил Менкяров туруорда.

Куукулалары «Тускул» СК иһинэн үлэлиир Надежда Яковлева салайааччылаах «Утум ситимэ» иистэнньэҥнэр түмсүүлэрэ тикпитэ. Түмсүү көхтөөх кыттыылаахтарынан Марфа Волкова, Дария Егорова, Наталья Яковлева, Венера Васильева, Анна Бугулова, Варвара Петрова уо.д.а. буолаллар.

-Биһиги, халбаакылар, иистэнньэҥнэрбит тикпит куукулалара Олоҥхо тыйаатырын кытта Саха Сирин араас муннуктарыгар сылдьалларыттан киэн туттабыт. Олоҥхо тыйаатыра оҕолорбутун кэлэн сэргэхситэн барбытыгар ис сүрэхпититтэн махтанабыт, — диэтэ Халбаакы нэһилиэгин баһылыга Алексей Васильев.

Николай Куприянов