Эҥэҕэ Олоҥхо дэкээдэтэ саҕаланна

Эҥэ нэһилиэгин биир биллэр олоҥхоһута Даарыйа Андреевна Томская-Чаайка муус устар 6 күнүгэр төрөөбүтэ 110 сылын туолла.

   Даарыйа-Чаайка үйэтин тухары Оһохтоох диэн сиргэ олорбута. Сүөһү көрүүтүгэр үлэлээбитэ.

  Былыр Дьааҥы сиригэр Уус Алдантан дьон кэлэн олохсуйбута диэн кэпсииллэр. Ол иһин манна Бурцевтар диэн араспаанньа баар буолбут буолуохтаах. Бадаҕа, ол кэлбит дьон олоҥхолоро манна тарҕаммыт.

Ол Оһохтоох диэн сиргэ урукку кэмҥэ киэһэтин олоҥхолуур эбиттэр. Дьэ, ону истэн, үөрэтэн, Даарыйа олоҥхолуур идэлэннэҕэ.

   Урут кини тойугун, ырыатын ким да сэҥээрбэт эбит. Ону Ия Ильична Стручкова диэн кыыс, саха салаатыгар үөрэнэ сылдьан, манна Эҥэ олоҥхоһуттарын чинчийэ кэлбит. Сүрүн сыала: дипломнай үлэ суруйуохтаах эбит. Ол кэлэ сырыттаҕына, Варвара Ивановна Соловьева диэн зоотехник кыыс: «Манна наар тойуктуу, ыллыы сылдьар эмээхсин баар, ону кытта кэпсэт», — диэн Даарыйаны ыйан биэрбит.

          Ия Ильична Даарыйа Андреевна Томскайаны дипломнай үлэтигэр киллэриэҕиттэн ыла, дьэ, Даарыйа-Чаайка аата биллэн барар. Маны Василий Васильевич Илларионов диэн учуонай сэргиир, Даарыйа Андреевна олоҥхотун чинчийэр, олоҥхоһут быһыытынан үүнэн тахсыытыгар көмөлөһөр. Онон Ия Ильична, Варвара Ивановна, Василий Васильевич кинини өрөспүүбүлүкэҕэ биллэр олоҥхоһут кэккэтигэр киллэрэллэр.

   Даарыйа Андреевна олоҥхотун биһиги аҕыйаҕы билэр буолан, оҕолорбутугар үксүн «Эрбэҕэр эрчимнээх Элитэр Бэргэн», «Үчүгэй Үөдьүгүйээн, Куһаҕан Ходьугур» диэн олоҥхолоруттан үөрэтэбит.

    Былырыын оскуоланы бүтэрбит Света Бурцева Олоҥхо өрөспүүбүлүкэтээҕи ыһыаҕар да, «Олоҥхо оҕотобун» диэн куонкурустарга кыттан, анал аат хаһаайката буолуталаабыта уонна бастакы миэстэлэргэ да тиксибитэ. Научнай-практическай кэмпириэнсийэлэргэ Даарыйа Андреевна олоҥхолорунан хаста да кытынныбыт, бириистээх миэстэлэри ылаттаабыппыт.

    Бэҕэһээ олоҥхоһут төрөөбүт күнүгэр Даарыйа Чаайка олоҕун туһунан сиэн балта Мария Афанасьевна Стручкова кэпсээтэ, онтон эмиэ биир сиэн балта Цырендондопова Зоя Николаевна Даарыйа төрөөбүт Таастаах диэн сирин туһунан сырдатта. Ити кэнниттэн оҕолорго оҕолор урут олоҥхону толорбут видеоларын көрдөрдүбүт.

Олоҥхону толорооччубут Снежана Бурцева (IX кыл.) «Күн Күөһэҥсэ бухатыыр»  диэн олоҥхону толордо, дьон кэрэхсэбилин ылла. Быйыл Үөһээ Бүлүүгэ буолбут Олоҥхо ыһыаҕар Снежана II миэстэлээх. Талааннаах кыыс сахалыы дэгэрэҥ да ырыалары ыллыыр. Билигин эксээмэн туттараары, күн солото суох сылдьар.

   Олоҥхо сюжеттарынан уруһуй күрэҕэ ыытылынна. Онно Вика Соловьева (IX кыл.), Степанова Рада (VIII кыл.), Устинья Уйусхан (VI кыл.) уруһуйдара биһирэннэ.

   Ити курдук олоҥхобут дэкээдэтин саҕалаатыбыт.

         Екатерина Заровняева,

Эҥэ, Дьааҥы