Бэдьээлэ олоҕун дьүһүйэн…

Нам улууһугар сылын аайы, үгэс быһыытынан, нэһилиэктэр икки ардыларыгар уус-уран самодеятельность фестивала ыытыллар.

Быйыл 4 түһүмэҕинэн барда. Олортон биирдэстэрэ – фольклорнай дьүһүйүү уонна олоҥхону биирдиилээн толоруу.

П.П. Ядрихинскай-Бэдьээлэ аатынан Олоҥхо дьиэтэ Лиэнскэй нэһилиэк талааннаах уонна баҕалаах ыччат дьонун, көхтөөх олохтоохторун түмэн, Нам улууһун өрөспүүбүлүкэҕэ биллэр олоҥхоһута, ССРС суруйааччыларын сойууһун чилиэнэ Бэдьээлэ «Тараҕана сайылыга» тойугунан фольклорнай дьүһүйүүнү бэлэмнээн туруорда, Бэдьээлэ олоҕуттан биир кэрчик кэмин көрдөрдө.

Ол курдук, дьүһүйүү Владимир Осипов «Тараҕана сайылыга» тойугунан саҕаланна. Онтон дьахталлар омурҕаҥҥа тахсан чабырҕахтаатылар, норуот ырыатынан киэргэтэн, кылыһахтаахтык туойан, хомуһунан ситэрэн, сахалыы инструменнарынан доҕуһуоллаан, түмүккэ дьүһүйүү оһуохайынан бүттэ. “Эрэкэ-дьэрэкэ» (сал. Т.А. Мегина), «Эр тыын» (С.А. Находкин) бөлөхтөр кытыннылар. Олоҥхону В.В. Сыромятников Бэдьээлэ «Дьырыбына Дьырылыаттатыттан» быһа тардан толордо.

Түмүккэ дьүүллүүр сүбэ быһаарыытынан, элбэх нэһилиэнньэлээх улахан бөһүөлэктэр бөлөхтөрүгэр III миэстэни ыллыбыт.

Туйаара Мегина,

Олоҥхо дьиэтин үлэһитэ.