Ыһыах курдук буолла

“Кэскиллээх норуот кэрэхсэбиллээх дьонун кэриэстиир” диэн бөлүһүөк учуонай Авксентий Мординов этиитэ, аҥаардас үбүлүөйтэн үбүлүөйгэ эрэ санаан-ахтан ааспакка, мэлдьи өйбүтүгэр-сүрэхпитигэр илдьэ сылдьан, араас хайысхалаах тэрээһиннэри тиһигин быспакка ыытарга ыҥырар ис хоһоонноох буоллаҕа эбээт.

Сунтаардар онно холобур буолардыы, саха дэгиттэр талааннаах киһитэ Сергей Зверев-Кыыл Уола 1948 сыл муус устар 9 күнүгэр Саха АССР Үрдүкү Сэбиэтин Бочуоттаах грамотатын ылбыт күнүн

киниэхэ сүгүрүйэр күнүнэн 2018 сыллахха биллэрэннэр, быйыл “Тоҕус оһуордаах түһүлгэ” иккис төгүлүн ыытылынна.

Барыта 628 киһи 10 улуустан кэлэн, Кыыл Уола баһылаабыт 9 көрүҥэр – олоҥхону толорууга, оһуохайга, тойукка, норуот ырыатыгар, сахалыы доҕуһуолга, үҥкүүгэ, уус-уран ааҕыыга, көмүс оҥоһуктарга, саха быһаҕар – бастыыр иһин күрэхтэстилэр.  Орто Халыма курдук ыраах сиртэн тиийэ кэлбиттэр.

Аҕам саастаах кыттааччы үгүһэ сөхтөрдө.  Ол курдук, Маар Күөлтэн Ырыа Арамаан 83, Дьокуускайтан олоҥхоһут Никандр Тимофеев 89, Үөһээ Бүлүүттүн Прасковья Баскарова  85, Лидия Афанасьева 84 саастаахтар. Оттон  олортон саамай кырдьаҕастара Мария Чокурова 93-тээх (Наахара, Сунтаар). Кырачаан күрэстэһээччилэр – саҥа саҥара сатыы сылдьар 3-тээх оҕолор. Онон 90 сылынан араастаһар саастаах дьону түмпүт “Тоҕус оһуордаах түһүлгэ” бэйэтэ ыһыах курдук буолла.

         Көрүҥ ахсын бастыҥнартан биир кылаан чыпчаал кыайыылааҕы быһаарыы быраабылатын бу тэрээһини үбүлээбит биир дойдулаахтара, “Арктик Капитал” тэрилтэ салайааччыта Матвей Евсеев олохтообута. Ол курдук,  ким “кылаан кыайыылаах” диэн кумааҕыны тардан ылбыт, ол  харчынан бириэмийэлэнэр. Ол эбэтэр «Оҕонньор бэйэтэ быһаарыаҕа» диэн буолар.

Бэйэлэрин көрүҥнэригэр бастаабыт 9 оҕо, 9 улахан киһи тахсан, тууйастан сэриэбиэй курдук таллылар. Оҕолорго оһуохайга I миэстэ буолбут Дьуур Егоров уонна С.Зверев “Айхал эйиэхэ, аар тайҕа!” поэматын ааҕан бастаабыт  Никандр Тимофеев кылаан кыайыылаах аатын ыллылар.

Кыыл Уолун туһунан кинигэлэри бу сигэлэринэн босхо онлайн ааҕыаххытын сөп:

Сергей Зверев туһунан Биобиблиографическай ыйынньык https://new.nlrs.ru/open/47913

Сергей Зверев — түһүлгэ тойуксута https://new.nlrs.ru/open/8265