“Күннээх Күүкэйдэр” күннээтибит

Сунтаар улууһун Күүкэй оскуолатын учууталлара дойдуга Учуутал уонна настаабынньык, улууспутугар Төрөөбүт тыл сылларынан “Күннээх Күүкэй” диэн хоһоон ааҕааччылар бөлөхтөрүн тэриммиппит.

 Көҕүлүүр салайааччыбытынан саха тылын уонна литературатын уопуттаах учуутала Ангелина Петровна Евсеева буолар.

 Тыл сүмэтэ, кэрэтэ, хомоҕойо түмүллүбүт “Ийэ тыл” көҥүл түмсүү таҥан таһаарбыт “Хомуһуннаах тоҕус хоһоонуттан” талан ылан, өйтөн ааҕан, номнуо иккис күрэспитигэр бириистээх миэстэҕэ тигистибит.

 Муус устар 8-9 күннэригэр Сунтаарга норуот тылынан уус-уран айымньытын “Тоҕус оһуордаах түһүлгэ” өрөспүүбүлүкэтээҕи күрэһэ иккис сылын ыытылынна.

Икки күннээх күрэскэ “Күннээх Күүкэй” бөлөх II миэстэ буолан, 8000 солк. суумалаах сэртипикээттээх туоһу суругу тутан үөрдүбүт. Элбэх киһи хоһоонунан дьүһүйүүбүтүн сэҥээрдэ.

Биһигини үөрэппит 89 саастаах кырдьаҕас учууталбыт Никандр Прокопьевич Тимофеев улуу Сибиэрэп поэматын ааҕан бастыан бастаата. Этэҥҥэ бэрт тэтиэнэх сылдьарыттан үөрдүбүт. Кини урут даҕаны уһуун-уһун хоһооннору ааҕарын сөҕө-махтайа көрөрбүт.
Күрэс тоҕус араас түһүлгэтин кыайыылахтара тахсан, 300.000 солк илии баатынан бирииһи таттылар. Былырыын Кыыл Уола туруорбут “Оһуор” үҥкүүтэ 65 сылын туоларыгар, анаабыт курдук, үҥкүүһүттэр бөлөхтөрө ылбыта. Бу сырыыга, эмиэ анаабыт курдук, Никандр Прокопьевичка түбэстэ. Этэргэ дылы, үөһэттэн ытык кырдьаҕас бэйэтэ быһаардаҕа.

 Бу күннэр дьиҥ сахалыы эйгэҕэ аастылар. Сунтаар уулуссалара кыттааччылар кылыһахтаах куоластарынан, Улуу Сибиэрэп маанылаах тойугунан туолан, сахалыы тыыҥҥа куустаран, бэрт сэргэхтик буолан ааста.

Ксения Саввинова,

Күүкэй, Сунтаар

Кыыл Уолун туһунан кинигэлэри бу сигэлэринэн босхо онлайн ааҕыаххытын сөп:

Сергей Зверев туһунан Биобиблиографическай ыйынньык https://new.nlrs.ru/open/47913

Сергей Зверев — түһүлгэ тойуксута https://new.nlrs.ru/open/8265