“Олоҕу уруйдуур олоҥхо тыыннаах тойуга”
Биир дойдулаахпыт, ССРС, Саха АССР норуодунай артыыһа, Саха АССР ускуустубатын үтүөлээх деятелэ, бастакынан олоҥхону тыйаатырга сыһыарбыт режиссер, 1957 сыллаахха Москва куоракка “Ньургун Боотур” опера-олоҥхону туруорбут Василий Васильевич Местников быйыл төрөөбүтэ 115 сыла. Онон ситимнээн мэҥэлэр норуот күүһүнэн “Олоҕу уруйдуур олоҥхо тыыннаах тойуга” испэктээк үрдүк таһымнаахтык туруоран көрдөрдүлэр.
Майа сэлиэнньэтигэр уонна улууспутугар айымньылаахтык үлэлии-хамсыы сылдьар уус-уран кэлэктииптэр, биирдиилээн толорооччулар холбоһуктаах дьүһүйүүлэрин саалаҕа толору мустубут дьон-сэргэ биһирээтэ.
Норуот күүһүнэн турбут олоҥхо дьүһүйүүтүгэр кыттыбыт бары артыыстары улуус баһылыга Дмитрий Тихонов аатыттан улуус баһылыгын социальнай уонна имиджевэй бэлиитикэҕэ солбуйааччы Альбина Григорьева эҕэрдэлээтэ уонна кылаабынай режиссерга, РФ, СӨ култууратын үтүөлээх үлэһитигэр, “Душа России” национальнай бириэмийэ лауреата Василий Винокуровка махтанан туран, эҕэрдэ суругу туттарда. Василий Васильевич Местников сиэнэ Ньургуйаана Местникова, кини олоҕун аргыһа, СӨ Бырабыыталыстыбатын бэрэссэдээтэлин солбуйааччы Михаил Никифоров, Ил Түмэн дьокутаата Андрей Находкин, улуустааҕы култуура салалтатын салайааччыта Анна Исакова эҕэрдэ тыллары эттилэр.
Музыкальнай-театрализованнай туруорууга Н. Васильева аатынан Майатааҕы норуодунай хор, «Кыталык» үҥкүү норуодунай ансаамбыла, Майатааҕы М.Попова аатынан Оҕо ускуустубатын оскуолатын уһуйааччыларын уонна үөрэнээччилэрин норуодунай оркестра, “Добун дорҕоон” уус-уран ааҕыы, “Дьиэрэй” фольклор, «Кыталыына», «Леди-дэнс» үҥкүү бөлөхтөрө, «Айыына», «Сардаана» вокальнай ансаамбыллар, фольклор толорооччулара уонна култуура үлэһиттэрэ Виталий Никифоров, Аграфена Зыкова, Николай Васильев, Ульяна Ефремова, Иван Григорьев, Данил Осипов, Аксиния Степанова, Улмас Федоров, Валентина Кривошапкина, Спиридон Григорьев, Саргылана Кириллина, Игорь Игнатьев, Раиса Скрябина кыттыыны ыллылар. Туруорааччы режиссердар — Данил Осипов уонна Александра Скрябина.
Олоҕун тыйаатырга анаабыт артыыс, режиссер, уһуйааччы, ытыктыыр, киэн туттар биир дойдулаахпыт Василий Васильевич Местников үтүө аата ааттана, үйэтитиллэ турдун!
Анастасия Федорова,
Мэҥэ Хаҥалас