«Олоҥхо ойуута»
Мукучуга «Дайан» сынньалаҥ киинигэр А.Д. Макарова аатынан Култуура уонна ускуустуба кэллиэһин төрдүс кууруһун устудьуона Сергей Гаврильев П.А. Ойуунускай төрөөбүтэ 130 сылынан, «Дьулуруйар Ньургун Боотур» олоҥхо тутулугар олоҕуран, оскуола оҕолоругар театральнай күрэх көрүҥүнэн «Олоҥхо ойуута» диэн отчуоттуур туруоруутун астына көрдүбүт.
Маныаха кыттыыны ыллылар: Н.П. Егоров аатынан Мастаах, И.Е. Левин аатынан Танара орто оскуолаларын, Мукучутааҕы гимназия үөрэнээччилэрэ, «Дэриэбинэчээн» тыйаатыр артыыстара.
Бастакынан ыалдьыттарбыт, Мастаах оскуолатын оҕолоро (салайааччы С. Жакипова), олоҥхоттон быһа тардыыны эт куоластарынан ыллаан-туойан, кэпсээн-ипсээн көрдөрдүлэр.
Иккиһинэн, олохтоох оскуола, гимназия үөрэнээччилэрэ, «Дайан» сынньалаҥ киинин, норуот тыйаатырын артыыстара олоҥхону аныгылыы уоттаан-күөстээн, буруолаан-тараалаан, тыастаан-уустаан туруордулар. Абааһыларбыт сыанаттан ойон түһэн сырыттылар.
Дьүүллүүр сүбэ быһаарыытынан, I миэстэни Мастаах оскуолатын олоҥхоһуттара ыллылар. Иккискэ олохтоохтор холбоһуктаах хамаандалара тигистэ. «Дьахтар бастыҥ оруола» — Д. Михайлова, Танара оскуолата. «Эр киһи бастыҥ оруола» — С. Волков (Мукучу гимназията).»Бастыҥ тойуксут» — Мастаах Туйаарыма Куота Ю.Михайлова. Аллараа дойду дьоруойдарын оонньообут С.Айтал, И.Харысхан анал бириискэ тигистилэр.
Олоҥхо киэһэтин арыйыытынан С. Волков ааттаныан ааттана. «Бу хайаларын оҕотой? Саҥарара уратытын, оруолун кыайа тутарын… «- диэн сэргии олордубут. Маны таһынан «Бастыҥ көстүүм» — мастаахтар, «Музыканан бастыҥ киэргэтии» — мукучулар.
Устудьуон Сергей Гаврильев быраактыкатын «Дайан» сынньалаҥ киинин үлэһитэ И.Н. Находкина салайбыт. Ыйы быһа эрчийэн,сыралаһан туруорбуттар. Маныаха көмөлөспүт, өйөөбүт дьонунан буолаллар: Мукучу нэһилиэгин баһылыга Н.И. Левин, модельнай библиотека сэбиэдиссэйэ И.Н Им., ИП «Ксенофонтов П.П.», «Николаева Т.И»., «Дайан» сынньалаҥ киинэ. Кинилэргэ анаан Сергей үрдүк сыанаттан дириҥ махталын тириэртэ.
Түмүккэ, хаһан да буолбатах астык туруорууну көрдүбүт. Ураты талааннаах оҕолор баалларын бэлиэтээн эттэ тыйаатыр режиссера С.Е. Иванова.
«Арылы» эдэр кэрэспэдьиэннэр пресс-кииннэрэ.
Мукучу, Кэбээйи