Төрөөбүт тылы олоҥхонон үөрэтиини сэҥээрдилэр

Үөрэхтээһиҥҥэ уонна наукаҕа туһуламмыт “Сибиир сөбүлэҥэ” диэн эрэгийиэннэр икки ардыларынааҕы ассоциация иһинэн тэриллибит Координационнай сэбиэт оробуочай бөлөҕө Сибиир уонна Уһук Илин норуоттар тылларыгар анаммыт мунньаҕа буолан ааста.

Бу мунньахха Бурятия, Тыва, Алтаай, Хакасия өрөспүүбүлүкэтин  бэрэстэбиитэллэрэ, уһуйааччылара, учуонайдара кыттыыны ыллылар. Биһигиттэн Ил Түмэн үөрэххэ, наукаҕа, уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева Саха Сиригэр төрөөбүт тыллары үөрэтии хайдах барарын кэпсээтэ. Кини Арассыыйа үөрэҕин бырагырааматыгар төрөөбүт тылы үөрэтиигэ бэриллэр чааһы элбэтэри туруорсарга, олимпиадалары ыытарга, методистары бэлэмнииргэ харчы көрүллэрин ситиһэргэ ыҥырда.

Атын эрэгийиэннэр сахалар төрөөбүт тылы олоҥхо нөҥүө үөрэтэрбитин  сэҥээрдилэр. “Биһиги эпостарбытыгар эһиги курдук улахан болҕомтону уура иликпит. Бу уопуккутун туһаныахпытын наада эбит”, — диэн эттилэр.

Ити кэпсэтии барыта боротокуолланна, онон этиллибит санаа кумааҕыга эрэ хаалбакка, олоххо киирэригэр эрэнэбит.