Ийэ олоҥхоһукка сүгүрүйэн
Биһиги Дьааҥыбыт сиригэр ытык ыалдьыттарбытын көрүстүбүт – ХИФУ бэрэпиэссэрэ, наука дуоктара, олоҥхону чинчийбит эпосовед Василий Васильевич Илларионовы итиэннэ СӨ култуураҕа уонна духуобунай сайдыыга министиэристибэтин бырайыактары сүрүннүүр отделын салайааччыта Сардаана Семёновна Брызгалованы.
Кинилэр көтөн кэлээт, оройуон дьаһалтатын, улуус култууратын салалтатын үлэһиттэрин кытта көрсөн баран, Верхоянскай куораппытыгар Ийэ олоҥхоһуппут Даарыйа Томская-Чаайка анаммыт пааматынньыкка Дьааҥы дьонун кытта үөрүүлээх быһыыга көрүстүлэр.
Быйыл Ийэ олоҥхоһуппут Даарыйа Томская-Чаайка төрөөбүтэ 110, оттон кырдьаҕас Верхоянскай куораппыт 385 сыллара. Үгэскэ кубулуйбут «Верхоянскай – Тымныы Чыпчаала» фестивальбыт быйыл ити үбүлүөйдээх дааталарга ананан, үрдүк таһымнаахтык ааста. Ол чэрчитинэн бу Ийэ олоҥхоһуппут аатын мэҥэ тааска суруйан үйэтиттибит уонна 110 сибэкки дьөрбөтүн уурдубут.
Василий Васильевич, Сардаана Семёновна, итиэннэ бэйэбит олохтоох дьоммут, олоҥхону чинчийээччи, үөрэтээччи Ия Ильинична Стручкова, Даарыйа Андреевна сиэн балта, Дьааҥы ураты олоҥхотун тарҕатааччы, уһуйааччы Мария Афанасьевна Стручкова, улуустан Ассоциация филиалын салайааччыта Екатерина Ноговицына, куорат баһылыгын солбуйааччы Сергей Семёнович Окоемов махтал, эҕэрдэ тылларын эттилэр. Верхоянскайдааҕы Оҕо музыкальнай оскуолатын үлэһиттэрэ олус бэрт сценарийдаан, дьааҥылыы туойан, историческай суолталаах пааматынньыкка өйдөбүл тэрээһини бэрт сэргэхтик ыыттылар.
Салгыы киэн туттар киһибит Варвара Захаровна Кириллина аатынан «Тымныы чыпчаала» түмэлгэ анал көрсүһүү, олоҥхо тула кэпсэтии буолла.
Улууспут тэрилтэлэрин салайааччылара, Верхоянскай куораппыт уопсастыбаннаһа, олоҥхону сэҥээрээччилэр, энтузиастар, ыччаттар, култуура эйгэтин үлэһиттэрэ мустан, Даарыйа Чаайканы ахтан-санаан аастылар.
«Тымныы Чыпчаала» түмэлбит үлэһиттэрэ олус бэркэ барытын бэлэмнээн, тэрийэн, үс дьиэнэн араас хабааннаах тэрээһиннэр аастылар. Виртуальнай музейбытыгар норуот маастара Майя Афанасьевна анал быыстапката, Даарыйа Андреевнабытыгар аналлаах Олоҥхобут балаҕана дьон сэнээриитин ыллылар.
Мария Стручкова,
Верхоянскай, Үөһээ Дьааҥы.